រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី១១ ខែវិច្ឆិកា ឆ្នាំ២០១៩ បានសម្រេចឃុំខ្លួនជនជាតិចិន៥នាក់ ដាក់ពន្ធនាគារជាបណ្តោះអាសន្ន ពាក់ព័ន្ធករណីបង្ខាំង មនុស្សទុកជំរិតទារប្រាក់ ជាជនជាតិចិនដូចគ្នា ។
សេចក្តីរាយការណ៍បន្តថា ជនសង្ស័យទាំង៥នាក់នោះមាន ១.ឈ្មោះ វ័ង ជីងប៉ង (WANG.JINBO) ភេទប្រុស អាយុ៤៩ឆ្នាំ ២.ឈ្មោះ លី ជីយ៉ាង (LI JI YAN) ភេទប្រុស អាយុ៣៥ឆ្នាំ ៣.ឈ្មោះ ថាង វ៉ៃ ភេទប្រុស អាយុ៣៥ ឆ្នាំ ៤.ឈ្មោះ ជេរ ឈីង (JIA GUING) ភេទប្រុស អាយុ៣៣ឆ្នាំ និង ៥.ឈ្មោះ ស៊ូន ស៊ីង (SUN XIN) ភេទប្រុស អាយុ ២៩ឆ្នាំ ។
សេចក្តីរាយការាណ៍បន្តទៀតថា កាលពីរសៀលថ្ងៃទី៨ វិច្ឆិកា សមត្ថកិច្ចជំនាញនៃការិយាល័យប្រឆាំងការជួញដូរមនុស្ស និងការពារអនិតិជន កងរាជអាវុធហត្ថរាជធានីភ្នំពេញ បានបញ្ជូនជនសង្ស័យជាជនជាតិចិនចំនួន៥នាក់នោះទៅកាន់សាលាដំបូងរាជធានីភ្នំពេញ ក្រោមការចោទប្រកាន់ពីបទ បង្ខាំងមនុស្សទុកជំរិតទារប្រាក់ រំលោភលើលំនៅដ្ឋាន បង្ខាំងអាជីវកម្ម និងធ្វើឲ្យបាត់បង់ការងារ ដែលប្រព្រឹត្តកាលពីថ្ងៃទី៤ វិច្ឆិកា នៅចំណុចហាង ស៊ីន វ៉ាងដា (ខេមបូឌា) អ៊ិន វេស ម៉ិន អ.ក ស្ថិតក្នុងផ្ទះលេខ ១២៨A៧AB ភូមិ១ សង្កាត់ទន្លេបាសាក់ ខណ្ឌចំការមន រាជធា នីភ្នំពេញ ។
ហើយបើតាមរបាយការណ៍របស់កងរាជអាវុធហត្ថ បានឲ្យដឹងថា មានសាក្សីម្នាក់បានរាយការណ៍ប្រាប់សមត្ថកិច្ចថា គេបានឃើញជនជាតិចិនមួយក្រុមកំពុងអុកឡុកហាងបាយមួយកន្លែង និងមានចាប់បង្ខាំងជនជាតិចិនម្នាក់ នៅក្នុងហាងបាយនោះផងដែរ ក្នុងគោលបំណងគំរាមទារប្រាក់ ។
បន្ទាប់ពីទទួលបានព័ត៌មាននោះ កម្លាំងសមត្ថកិច្ចជំនាញ នៃការិយាល័យប្រឆាំងការជួញដូរមនុស្ស និងការពារអនិតិជន កងរាជអាវុធហត្ថរាជធានីភ្នំពេញ នាថ្ងៃទី៥ ខែវិច្ឆិកា បានចុះទៅបង្ក្រាប និងឃាត់ខ្លួនជនសង្ស័យចំនួន៥នាក់ ក្រោមបញ្ជាផ្ទាល់លោកឧត្តមសេនីយ៍ ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និង ជាមេបញ្ជាការកងរាជអាវុធហត្ថរាជធានីភ្នំពេញ ក្រោមការសម្របសម្រួលពីស្ថាប័នអយ្យការ និងមានការចូលរួមពីមន្ត្រីមូលដ្ឋានភូមិ-សង្កាត់ផងដែរ ។
នៅចំពោះសមត្ថកិច្ចជនសង្ស័យបានសារភាពថា ពួកគេពិតជាបានធ្វើសកម្មភាពបង្ខាំងមនុស្សនៅក្នុងហាង ស៊ីន វ៉ាងដា (ខេមបូឌា) អ៊ិនវេសមិន និងភ្ញៀវស្នាក់នៅក្នុងសណ្ឋាគារ រួមទាំងបណ្តេញបុគ្គលិកដែលធ្វើការនៅទីនោះប្រាកដមែន ដោយឈ្មោះ វ័ង ជីងប៉ង (WANG.JINBO) ជាមេក្លោង បានបញ្ជាឲ្យកូនចៅ៤នាក់ទៀត បិទទ្វារចាក់សោរបង្ខាំងមេការគ្រប់គ្រងទូទៅក្នុងហាង ចាប់ពីថ្ងៃទី៤ រហូតដល់ថ្ងៃទី៥ វិច្ឆិកា ឆ្នាំ២០១៩ ដើម្បីទុកជំរិតទារប្រាក់ចំនួន៣០ ០០០ ដុល្លារអាមេរិក ពីថៅកែនៅឯប្រទេសចិន ។
