ខេត្តរតនគិរី៖ ជនសង្ស័យប្រុសស្រី២នាក់ជាមុខសញ្ញាជួញដូរ និងប្រើប្រាស់គ្រឿងញៀន ខុសច្បាប់ ត្រូវបានកម្លាំងជំនាញចុះស្រាវជ្រាវបង្ក្រាបដោយវិធានញុះញង់ បន្ទាប់ពីរត់គេចខ្លួនបាត់មួយរយៈខ្លីក្នុងពេលអនុវត្តន៍វិធានការណ៍។ ប្រតិបត្តិការបង្ក្រាបរបស់សមត្ថកិច្ចនោះធ្វើឡើង កាលពីម៉ោង៣និង៣០នាទីរសៀល ថ្ងៃទី១៨ ខែកុម្ភៈ ឆ្នាំ២០១៩ នៅចំណុចខាងកើតប្រលានយន្តហោះ ស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី។
ជនសង្ស័យទាំង២នាក់ខាងលើ ១-ឈ្មោះ ពិជ្រ ពៅ ភេទប្រុស អាយុ២១ឆ្នាំ និង២-ឈ្មោះ ខន តឿ ភេទស្រី អាយុ២៦ឆ្នាំ ចំណែកវត្ថុតាងដែលរឹបអូសបានរួមមាន ម្សៅក្រាមសថ្លាសង្ស័យសារធាតុញៀនចំនួន០១កញ្ចប់ធំ ទម្ងន់១០.៨១ក្រាមទាំងសំបកថង់ ជញ្ជីញថ្លឹង០១គ្រឿង ដែកកេសចំនួន០៣ដើម និងថង់សំរាប់ច្រកថ្នាំញៀនមួយចំនួនធំទៀត។
បើតាមសមត្ថកិច្ចបានឱ្យដឹងថា ខណៈពេលដែលប្រើវិធានការណ៍ញុះញង់ដើម្បីចាប់ខ្លួនជនសង្ស័យប្រុសស្រីទាំង២នាក់ខាងលើនោះ ជនសង្ស័យជាមុខសញ្ញាមានល្បិចកលខ្ពស់ គឺបានណាត់ជួបជាមួយភ្នាក់ងារសំងាត់របស់សមត្ថកិច្ច ហើយធ្វើការប្រគល់លុយជាមុន បន្ទាប់មកឱ្យភ្នាក់ងារសំងាត់នោះទៅយកថ្នាំញៀនដែលប្លុងលាក់ទុកចោលនៅកន្លែងផ្សេង។ ជាហេតុធ្វើឱ្យជនសង្ស័យទាំង២នាក់ឆក់ឱកាសជិះម៉ូតូគេចខ្លួនបាត់ស្រមោលតែម្តង ធ្វើឱ្យកម្លាំងសមត្ថកិច្ចជំនាញបរាជ័យក្នុងការចាប់មុខសញ្ញាមិនបានឡើយ។
ប្រភពដដែលបន្តថា លុះដល់ម៉ោង៩និង៣០នាទីយប់ក្នុងថ្ងៃដដែលនោះ ទើបកម្លាំងជំនាញបន្តធ្វើការស្រាវជ្រាវតាមរកចាប់ខ្លួនមុខសញ្ញានោះបានតែម្តងនៅចំណុចចំការកៅស៊ូ ស្ថិតក្នុងភូមិ៤ សង្កាត់កាចាញ ក្រុងបានលុង ខេត្តរតនគិរី។ ក្រោយឃាត់ខ្លួន ជនសង្ស័យរួមទាំងវត្ថុតាងក៏ត្រូវបានធ្វើការឃុំខ្លួន និងរក្សាទុកបណ្ដោះអាសន្ននៅការិយាល័យជំនាញដើម្បីកសាងសំណុំរឿងបញ្ជូនទៅអយ្យកាអមសាលាដំបូងខេត្តចាត់ការតាមនីតិវិធីច្បាប់៕