យី​ណ៎​! លេង​សុទ្ធតែ​កាំបិត​ដេញ​កាប់​ពិតជា​ខ្លាំង​ដៃ​មែន

ខេត្ត​ប៉ៃលិន៖ បន្ទាប់​ពី​សមត្ថកិច្ច​នគរបាល​ប៉ុស្តិ៍​រដ្ឋបាល​សង្កាត់​ទួល​ល្វា​បាន​ទទួល​ពាក្យបណ្តឹង​ពី​ជន​រង​គ្រោះ​ម្នាក់​ឈ្មោះ ម៉ុ​ន ច​ន្ធូ ភេទ​ស្រី អាយុ​២០​ឆ្នាំ រស់នៅ​ភូមិ​វាលវង់ សង្កាត់​ទួល​ល្វា ក្រុងប៉ៃលិន ខេត្ត​ប៉ៃលិន ដែល​បាន​ប្តឹង​ទៅ​លើ​យុវជន​ម្នាក់​ខណៈ​ឈ្លោះ​គ្នា​តិច​តូច បែរជា​ទាញ​កាំបិត​ដេញ​កាប់​ក៏​ប្តឹង​ឱ្យ​ឃាត់ខ្លួន​តែ​ម្តង ។
ហេតុការណ៍​ចាប់​ឃាត់ខ្លួន​នេះ​បាន​កើតឡើង​កាលពី​វេលា​ម៉ោង​៨​និង​៣០​នាទី​យប់ ថ្ងៃ​ទី​០៦ ខែកុម្ភៈនេះ ស្ថិត​នៅ​ក្នុងភូមិ​វាលវង់ សង្កាត់​ទួល​ល្វា ក្រុងប៉ៃលិន ។ ប្រភព​ព័ត៌មាន​ពី​លោក យ៉ែ​ម សា​រិ​ទ្ធ អធិការ​នគរបាល​ក្រុងប៉ៃលិន​បានឱ្យ​ដឹង​ថា ជន​បង្កហេតុ​មានឈ្មោះ ស្រ៊ុ​ន សុខ ភេទ​ប្រុស អាយុ​២៣​ឆ្នាំ សញ្ជាតិ​ខ្មែរ មាន​ទីលំនៅ​ភូមិ​សង្កាត់​ជាមួយ​គ្នា ដោយ​ជន​រង​គ្រោះ​ប្តឹង​ពី​បទ​មនុស្សឃាត​គិត​ទុក្ខ​ជា​មុន ខណៈ​បាន​ធ្វើ​សកម្មភាព​យក​កាំបិត​ដេញ​កាប់​ជន​រង​គ្រោះ​បន្ទាប់​បី​ពួក​គេ​មានការ​ឈ្លោះ​ទាស់ទែង​គ្នា​តិច​តូច​។

លោក​បន្ត​ទៀត​ថា ក្រោយ​ពី​ទទួល​បាន​ពាក្យបណ្តឹង​ភ្លាម​កម្លាំង​អធិការដ្ឋាន​នគរបាល​ក្រុងប៉ៃលិន​បាន​សហការ​ជាមួយ​នគរបាល​ប៉ុស្តិ៍​រដ្ឋបាល​សង្កាត់​ទួល​ល្វា​ធ្វើការ​ស្រាវជ្រាវ និង​ចាប់​ឃាត់ខ្លួន​ជនសង្ស័យ​ខាងលើ​បាន ហើយ​ក្រោយ​ពី​ធ្វើការ​សាកសួរ​ជនសង្ស័យ​បាន​ឆ្លើយ​សារភាព​ថា ខ្លួន​ពិតជា​បាន​ដេញ​កាប់​ជន​រង​គ្រោះ​ដោយ​ប្រើ​កាំបិត​ពិតប្រាកដ​មែន ។

លោក​បញ្ជាក់​ថា ជនសង្ស័យ​ខាងលើ​ជា​មុខសញ្ញា​ប្រើប្រាស់​គ្រឿងញៀន​ជា​យូរ​មក​ហើយ ប៉ុន្តែ​នៅ​ថ្ងៃ​កើតហេតុ​បន្ទាប់​ពី​ពិនិត្យ​មើល​ទឹកនោម​មិនឃើញ​មាន​អ្វី​នោះ​ទេ ។ តែ​ទោះបីជា​យ៉ាងណា​ក៏​ដោយ​ពាក់ព័ន្ធ​នឹង​បញ្ហា​នេះ​បច្ចុប្បន្ន​សមត្ថកិច្ច​ជំនាញ​ផ្នែក​ព្រហ្មទណ្ឌ​នៃ​អធិការដ្ឋាន​នគរបាល​ក្រុងប៉ៃលិន​កំពុង​រៀបចំ​កសាង​សំណុំរឿង ដើម្បី​បញ្ជូន​ជនសង្ស័យ​ព្រមទាំង​វត្ថុ​តាង​ទៅ​អយ្យការ​អម​សាលាដំបូង​ខេត្ត​ប៉ៃលិន​ឱ្យ​ចាត់ការ​តាម​នីតិវិធី ៕
យី​ណ៎​! លេង​សុទ្ធតែ​កាំបិត​ដេញ​កាប់​ពិតជា​ខ្លាំង​ដៃ​មែន យី​ណ៎​! លេង​សុទ្ធតែ​កាំបិត​ដេញ​កាប់​ពិតជា​ខ្លាំង​ដៃ​មែន Reviewed by Bunlors on 2/07/2019 Rating: 5
Powered by Blogger.