ជិត៥គីឡូក្រាមលាក់ទុកក្នុងបាតកាបូបស្ពាយរបស់ជនបរទេសម្នាក់
07/02/2019
ខេត្តសៀមរាប៖ បុរសជាជនជាតិរ៉ូម៉ានីម្នាក់ត្រូវបានកម្លាំងនគរបាលការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តសៀមរាបបានសហការជាមួយកម្លាំងសមត្ថកិច្ចចាប់ឃាត់ខ្លួនពាក់ព័ន្ធនឹងករណីជួញដូរគ្រឿងញៀនចំនួនជិត៥គីឡូក្រាម និងផ្អាកការធ្វើដំណើរចេញពីប្រទេសកម្ពុជា កាលពីវេលាម៉ោង៩និង៥៥នាទីព្រឹកថ្ងៃទី៦ ខែកុម្ភៈ ឆ្នាំ២០១៩។
តាមប្រភពព័ត៌មានបានប្រាប់ឱ្យដឹងថា បុរសជាជនបរទេសដែលបានចាប់ឃាត់ខ្លួននេះ ឈ្មោះ OLARU NARCIS-MANUEL ជនជាតិរ៉ូម៉ានី ដែលត្រូវចេញដំណើរទៅទីក្រុងហុងកុង ប្រទេសចិន តាមជើងហោះហើរលេខ KA-249 (REP-HKG) ។
ក្នុងករណីសង្ស័យរត់ពន្ធគ្រឿងញៀនខាងលើនេះ ដោយយោងតាមការត្រួតពិនិត្យ និងធ្វើតេស្តបឋមជាមួយកងកម្លាំងសមត្ថកិច្ចពាក់ព័ន្ធ រកឃើញសារធាតុញៀនប្រភេទម្សៅក្រាមពណ៌ស ដែលជនសង្ស័យបានដាក់ក្នុងកញ្ចប់ថង់ប្លាស្ទិករាងសំប៉ែត៤ជ្រុង ចំនួន៤កញ្ចប់ លាក់ទុកក្នុងបាតកាបូបស្ពាយខ្នង ហើយគ្រឿងញៀនចំនួន៤ប្រភេទផ្សេងគ្នានោះជាប្រភេទគ្រឿងញៀនមេតំហ្វេតាមីន ដែលមានទម្ងន់ ៥.០២០ក្រាម ដោយក្នុងកញ្ចប់ទី១-មាន១.២១០ក្រាម, កញ្ចប់ទី២-មាន១.៣៥០ក្រាម, កញ្ចប់ទី៣-មាន១.២១០ក្រាម និងកញ្ចប់ទី៤-មាន១.២៥០ក្រាម។
បច្ចុប្បន្នបុរសជនសង្ស័យជាជនជាតិរ៉ូម៉ានីម្នាក់ខាងលើ រួមទាំងគ្រឿងញៀនជិត៥គីឡូក្រាមជាវត្ថុតាង ត្រូវបានឃាត់ខ្លួនប្រគល់ជូនកម្លាំងស្នងការដ្ឋាននគរបាលខេត្តសៀមរាប ដើម្បីចាត់ការទៅតាមនីតិវិធី៕
