កាតា ចង់​បង្កើត​​សម្ព័ន្ធ​តំបន់​ថ្មី ជំនួស​​សម្ព័ន្ធ​ដឹកនាំ​ដោយ​អារ៉ាប៊ីសាអូឌីត - សមាគម វិទ្យុ​ និងទូរទស្សន៍សំលេងជនពិការភ្នែក (VOB)

Mobile Menu

Top Ads

ចន្លោះទំនេរ សម្រាប់ដាក់ពាណិជ្ជកម្ម

អត្ថបទ និងព័ត៌មានថ្មីៗ

logoblog

កាតា ចង់​បង្កើត​​សម្ព័ន្ធ​តំបន់​ថ្មី ជំនួស​​សម្ព័ន្ធ​ដឹកនាំ​ដោយ​អារ៉ាប៊ីសាអូឌីត

17/12/2018
សហភាព​អឺរ៉ុប​៖ កាតា​បាន​អំពាវនាវ​​នៅ​ថ្ងៃ​សៅរ៍​ទី ១៥ ធ្នូ​២០១៨នេះ ចង់​បង្កើត​សម្ព័ន្ធ​តំបន់​ថ្មី មក​ជំនួស​សម្ព័ន្ធ​ក្រុមប្រឹក្សា​នៃ​កិច្ចសហប្រតិបត្តិការ​ឈូង​សមុទ្ទ​ពែក្ស (CCG) ដែល​គ្មាន​សមត្ថភាព​ដោះស្រាយ​វិបត្តិ​កាតា​ជាមួយ​បណ្តា​ប្រទេស​ជិត​ខាង។ តាំង​ពី​​ជាង​មួយ​កន្លះ​មក កាតា​ត្រូវ​បាន​ដាក់​ឱ្យ​នៅ​ឯកា គ្មាន​ទំនាក់ទំនង​ការ​ទូត ពាណិជ្ជកម្ម​និង​សេដ្ឋកិច្ច​ ​​ជា​មួយ​ក្រុម​ប្រទេសក្នុង​តំបន់​ដឹកនាំ​ដោយ​​អារ៉ាប៊ីសាអូឌីតទេ។

បង្កើត​ឡើង​នៅ​ឆ្នាំ​១៩៨១ ដើម្បី​ទប់​ទល់​នឹង​អ៊ីរ៉ង់ ក្រុមប្រឹក្សា​នៃ​កិច្ចសហប្រតិបត្តិការ​តំបន់​ឈូង​សមុទ្ទ​ពែក្ស (CCG) ដែល​ជា​សម្ព័ន្ធ​នយោបាយ​និង​សេដ្ឋកិច្ច ដឹកនាំ​ដោយ​អារ៉ាប៊ីសាអូឌីត បារ៉ែន អេមីរ៉ាតអារ៉ាប់រួម កូវ៉ែត កាតា និង​អូម៉ង់​ កំពុង​ក្លាយ​ជា​សម្ព័ន្ធ​ដែល​គ្មាន​អំណាច​ពិត​ប្រាកដ​ទៀត​ទេ ! នេះ​បើ​តាមប្រសាសន៍​របស់​​រដ្ឋមន្ត្រី​ក្រសួង​ការ​បរទេស​កាតា Cheikh Mohammed ben Aberrahmane នៅក្នុង​សន្និសីទ​រយៈ​ពេល​ពីរ​ថ្ងៃដែល​​គេ​ប្រសិទ្ធនាម​ថា វេទិកា​ដូហា។ វេទិកា​​បើក​ធ្វើ​ឡើងតែ​​មួយ​សប្តាហ៍ក្រោយ​ជំនួប​ប្រជុំ​ប្រចាំ​របស់​​សម្ព័ន្ធ​CCG នៅទីក្រុង​រីយ៉ាដដែល​បិទ​បញ្ចប់​ដោយ​គ្មាន​លទ្ធផល​និង​គ្មាន​វត្តមាន​កាតា។

សម្រាប់​លោក​ប្រមុខ​ការ​ទូត​កាតា ជម្លោះ​រវាង​កាតា​ជាមួយ​ក្រុមប្រទេស​ជិត​ខាង​នាំ​មុខ​ដោយ​អារ៉ាប៊ីសាអូឌីត តាំង​ពី​ជាង​១៨​ខែ​មក​នេះ បាន​ធ្វើ​ឱ្យ​សម្ព័ន្ធ​ក្លាយ​ជា​ស្ថាប័ន​មួយ​ដែល​​មិន​អាច​ផ្សះផ្សា​​បាន។ “គ្មាន​សមត្ថភាព​ដោះស្រាយ​ជម្លោះ​ក្នុង​តំបន់ ! សម្ព័ន្ធ​រួម​រឹត​ដោយ​វិបត្តិ ដូច្នេះ​សម្ព័ន្ធ​ដែល​នៅ​សេស​សល់​ត្រូវ​កែ​រចនា​​​សម្ព័ន្ធ​ថ្មី​ ដើម្បី​ធានាស្ថិរភាព​និង​សន្តិសុខ​តំបន់ ទៅ​ថ្ងៃអនាគត !"​។

ឆ្លៀត​ក្នុង​ឱកាស​បើក​វេទិកា​នេះ លោក​រដ្ឋមន្ត្រី​ការបរទេស​កាតា បាន​ធ្វើ​ការ​រិះគន់​យ៉ាង​ខ្លាំង​សម្ព័ន្ធ​អារ៉ាប៊ីសាអូឌីត-បារ៉ែន-អេមីរ៉ាតអារ៉ាប់រួម ដែលបាន​ផ្តាច់​ទំនាក់ទំនង​ជាមួយ​​កាតា តាំង​ពី​ខែ​មិថុនា​ឆ្នាំ​២០១៧​មក ថា​ជា​ការសាបព្រោះ​ការ​ភ័យ​ខ្លាច អំពើ​ឧក្រិដ្ឋ​ និង​ឃោសនា​ភូត​កុហក។ ​ចោទ​កាតា ថា​គាំទ្រ​ពួក​អ៊ីស្លាម​ជ្រុលនិយម​ ហើយ​ស្និទ្ធ​ជ្រុល​នឹង​​អ៊ីរ៉ង់ ​រីយ៉ាដ និង​សម្ព័ន្ធមិត្ត​ទាំងពីរ ​ហាក់ពុំ​ទាន់​ត្រៀម​លក្ខណៈ​​បន្ធូរ​បន្ថយ​ទណ្ឌកម្ម​ពី​កាតា​ឡើយ មក​ទល់​ថ្ងៃ​នេះ។

សហភាព​អឺរ៉ុប​ តាម​រយៈ​សំឡេង​របស់​ប្រធានាធិបតី​​រ៉ូម៉ានី​ ប្រធាន​ផ្លាស់​វេន​សហភាព បាន​ស្នើ​សុំ​ធ្វើ​ជា​អន្តរការី​ដោះស្រាយ​វិបត្តិ​កាតា-អារ៉ាប៊ីសាអូឌីត តែ​ប្រមុខ​ការ​ទូត​កាតា​ចង់​ឱ្យ​កូវ៉ែត​បន្ត​តួនាទី​ជា​អ្នក​សម្រប​សម្រួល​ច្រើន​ជាង។ កាតា​ចង់បាន​ការ​បញ្ចប់​វិបត្តិ​ដោយ​គ្រប់​ប្រទេស​ក្នុង​តំបន់​ឈូង​សមុទ្ទ​គោរព​​ឯករាជភាព​គ្នា​ទៅ​វិញ​ទៅមក ហើយ​បញ្ចប់​ការ​បិទ​ខ្ទប់​ដោយ​ឈរ​លើ​គោលការណ៍​ទទួល​ស្គាល់​គ្នា​ទៅ​វិញ​ទៅ​មក​ និង​ដោយ​មិន​ជ្រៀតជ្រែក​កិច្ចការ​ផ្ទៃ​ក្នុង​គ្នា។ នេះ​ជា​ការ​បញ្ជាក់​របស់​ព្រះ​ចៅ​កាតា Sheikh Tamim bin Hamad Al-Thani នៅ​កាន់​អង្គ​វេទិកា​ដូហា៕(អត្ថបទដកស្រង់ដោយ ទេព វណ្ណះ)