ស៊ីរី៖ ប្រតិបត្តិការវាយលុកទ្រង់ទ្រាយធំនៅខេត្ត Al-Suwayda ផ្តាច់ជីវិតសមាជិក ISIS ជាង២៧០នាក់ និងរឹបអូសអាវុធមានប្រភពពីបរទេសជាច្រើនទៀត...
03/12/2018
(ស៉ីរី)៖ កងទ័ពរដ្ឋាភិបាលស៉ីរី បានសម្លាប់ក្រុមសកម្មប្រយុទ្ធ ISIS ចំនួន ២៧០នាក់ នៅអំឡុងធ្វើប្រតិបត្តិការវាយលុកមួយក្នុង ខេត្តអាល់ស៊ូវ៉ៃដា (Al-Suwayda) កាលពីពេលថ្មីៗនេះ។ នេះបើតាមរបាយការណ៍ពីក្រសួងការពារជាតិរុស្ស៊ី ដកស្រង់ដោយសារព័ត៌មាន Sputnik នៅរសៀលថ្ងៃចន្ទ ទី០៣ ខែធ្នូ ឆ្នាំ២០១៨។
ក្រសួងការពារជាតិរុស្ស៊ីបានបញ្ជាក់ នៅក្នុងសេចក្ដីថ្លែងការណ៍របស់ខ្លួនដូច្នេះថា «នៅអំឡុងពេលបើកប្រតិបត្តិការវាយលុក កងទ័ពរដ្ឋាភិបាលស៉ីរីបានសម្លាប់ក្រុមសកម្មប្រយុទ្ធ ISIS ច្រើនជាង ២៧០នាក់ និងរឹបអូសបានអាវុធជាច្រើន ក្នុងនោះរួមមានទំាងមីស៊ីលប្រឆាំងរថក្រោះ TOW ព្រមទាំងអាវុធមួយចំនួនជាផលិតផលបរទេស»។ សេចក្ដីថ្លែងការណ៍បានបន្ថែមទៀតថា ក្រុមសកម្មប្រយុទ្ធ ISIS ភាគច្រើនមកពីតំបន់ អ៊ែតតាន់ (At-Tanf) ជាទីដែលយោធាអាមេរិកកំពុងឈរជើង។
គួរបញ្ជាក់ថា៖ ក្នុងរយៈពេលប៉ុន្មានឆ្នាំចុងក្រោយនេះ កងទ័ពរដ្ឋាភិបាលស៉ីរីបានរំដោះផ្ទៃដីជាង ១,៣០០គីឡូម៉ែត្រក្រឡា ពីក្រុមភេរវករ ISIS នៅក្នុងខេត្ត Al Suwayda។ មួយរយៈចុងក្រោយនេះ កងកម្លាំងរដ្ឋាភិបាលស៊ីរី ដោយមានការជួយជ្រោមជ្រែងពីរុស្ស៊ីនោះ បានទន្ទ្រានកាន់កាប់ទឹកដីពីក្រុមឧទ្ទាមប្រឆាំងរដ្ឋាភិបាល និងក្រុមភេរវករ ISIS ត្រឡប់មកវិញជាបណ្តើរៗ ហើយប្រជាជនស៊ីរីជាច្រើនក៏បានត្រឡប់មកកាន់កន្លែង ដែលទើបរំដោះនោះវិញផងដែរ៕
