ក្រុមជម្រើសជាតិកម្ពុជា នឹងបើកទ្វាផ្ទះទទួលក្រុមឡាវនាវេលាម៉ោង ៦:៣០ នាទីល្ងាចនេះនៅពហុកីឡដ្ឋានជាតិ ដែលជាការប្រកួតសន្សំពិន្ទុក្នុងពូល A នៃព្រឹត្តិការណ៍ AFF Suzuki Cup 2018 ។
គោព្រៃ កម្ពុជា និងព្រះច័ន្ទ ឡាវ សុទ្ធតែមិនទាន់ស្គាល់ជាតិឈ្នះដូចគ្នាក្នុងការប្រកួតសន្សំពិន្ទុក្នុងពូលកន្លងមក។ សម្រាប់ Honda វិញក៏មិនទាន់ធ្វើឲ្យអ្នកគាំទ្ររបស់ខ្លួនសប្បាយចិត្តម្ដងដែរ តាំងពីចូលខ្លួនមកដឹកនាំ ពោលគឺ ៥ ប្រកួតចាញ់ ៤ និងស្មើ១ប្រកួត។ យ៉ាងណាឡាវក៏មិនមែនជាក្រុមខ្លាំងពេក រហូតកម្ពុជាមិនអាចឈ្នះបានដែរ អាចថាជំនួបនេះជាឱកាសសម្រាប់ Honda សាងស្នាដៃជូនអ្នកគាំទ្រកម្ពុជាហើយ។
ល្ងាចនេះគោព្រៃ ដាច់ខាតត្រូវតែប្រឹងប្រែង ដើម្បីបន្តដង្ហើមអាចមានសង្ឃឹមឡើងទៅវគ្គបន្តក្នុងលក្ខខ័ណ្ឌ មីយ៉ាន់ម៉ា ឈ្នះវៀតណាម និងឈ្នះ ម៉ាឡេស៊ី ស្របពេលដែលកម្ពុជាត្រូវការឈ្នះវៀតណាមផងដែរ។ ទម្រង់លេងដែលកម្ពុជាអាចប្រើល្ងាចនេះអាច ៤-៣-៣ មាន៖ អ្នកចាំទី អ៊ុំ វិចិត្រ ខ្សែការពារ ឆេង ម៉េង, សឿយ វិសាល, ហុង ផេង, សារ៉េត គ្រីយ៉ា, ខ្សែបម្រើ ប្រាក់ ធីវ៉ា, សុះ ស៊ូហាណា, គួច សុកុម្ភៈ ខ្សែប្រយុទ្ធ រ៉ឹង ប៊ុនហៀង, ចាន់ វឌ្ឍនាកា និងកែវ សុខផេង៕