អារ៉ាប៊ីសាអូឌីត​ប្រកាសជាផ្លូវការថា អ្នកកាសែត​ដែលបាត់ខ្លួននោះ ពិតជាស្លាប់ក្នុងស្ថានកុងស៊ុល​​នៅតួកគីប្រាកដមែន! - សមាគម វិទ្យុ​ និងទូរទស្សន៍សំលេងជនពិការភ្នែក (VOB)

Mobile Menu

Top Ads

ចន្លោះទំនេរ សម្រាប់ដាក់ពាណិជ្ជកម្ម

អត្ថបទ និងព័ត៌មានថ្មីៗ

logoblog

អារ៉ាប៊ីសាអូឌីត​ប្រកាសជាផ្លូវការថា អ្នកកាសែត​ដែលបាត់ខ្លួននោះ ពិតជាស្លាប់ក្នុងស្ថានកុងស៊ុល​​នៅតួកគីប្រាកដមែន!

20/10/2018
(រីយ៉ាដ)៖ ទីបំផុត​រដ្ឋាភិបាលអារ៉ាប៊ីសាអូឌីត​បានទទួលស្គាល់ថា លោក ចាម៉ាល់ ខាសហូកជី (Jamal Khashoggi) ដែល​បាត់​​ខ្លួន​នោះ ពិតជាបាន​បាត់​បង់ជីវិត ក្នុងស្ថានកុងស៊ុល​អារ៉ាប៊ីសាអូឌីតប្រចាំ​នៅទីក្រុងអ៉ីស្តង់ប៊ុល នៃប្រទេស​តួកគីប្រាកដមែន ប៉ុន្តែការ​ស្លាប់​នោះ​​គឺ​បង្ក​​ឡើង​ដោយ​​ទំនាស់​​វាយ​តប់​គ្នា មិនមែនជាផែនការសម្លាប់ និងកាប់ជាកង់ៗ​ដូចការអះអាងរបស់តួកគី​នោះឡើយ។ នេះបើតាម​ការដកស្រង់ការ​ផ្សាយចេញពី​សារព័ត៌មាន CNBC នៅព្រឹក​ថ្ងៃសៅរ៍ ទី២០ ខែតុលា ឆ្នាំ២០១៨។
អារ៉ាប៊ីសាអូឌីត​បាន​អះអាងថា លោក Khashoggi បានឈ្លោះ​ទាស់ទែង និងវាយតប់គ្នា​ជាមួយ​មនុស្សមួយចំនួន ដែលលោក​បាន​ជួប​នៅ​ឯ​ស្ថានកុលស៊ុល​ខាងលើ កាលពី​ថ្ងៃទី០២ ខែតុលា ហើយក៏បានបាត់បង់ជីវិត​នៅក្នុងហេតុការណ៍នោះតែម្តង។ យ៉ាង​ណា​មិញ ការអះអាង​ខាងលើនេះ គឺផ្ទុយពីសេចក្តីរាយការណ៍​ព័ត៌មានមួយចំនួន ស្តីពីការបាត់បង់​ជីវិតអ្នកកាសែត​រូបនេះ។
តួយ៉ាង​បើតាមសារព័ត៌មាន​អាមេរិក The New York Times អាជ្ញាធរ​តួកគី បានបង្ហើប​ឲ្យដឹងថា ពួកគេមានភស្តុតាង​ជាសំឡេង ដែលអាច​បញ្ជាក់ថា លោក Khashoggi បានទទួលរង​ទារុណកម្ម​ហើយសម្លាប់ ព្រមទាំង​ត្រូវកាត់សាកសពជាកង់ៗ ដោយ​​​ក្រុម​ភ្នាក់ងារ​​សម្លាប់មនុស្សរបស់​អារ៉ាប៊ីសាអូឌីត។

ការអះអាងនេះទៀត​សោត ក៏ផ្ទុយពីការអះអាងនា​ពេលកន្លងទៅ​ របស់​រដ្ឋាភិបាល​អារ៉ាប៊ីសាអូឌីត​ផ្ទាល់ផងដែរ ដោយ​កាលនោះ​​​ព្រះអង្គម្ចាស់​ស្នងរាជ្យ​អារ៉ាប៊ីសាអូឌីត ម៉ូហាំម៉េដ ប៊ីន សាល់ម៉ាន់ (Mohammed bin Salman​) បានមានបន្ទូល​ប្រាប់​​សារព័ត៌មាន Bloomberg ថា លោក Khashoggi ដែលជា​អ្នកកាសែតរិះគន់​លើទ្រង់នេះ បានចូលទៅ​ក្នុងស្ថានកុលស៊ុល​អារ៉ាប៊ីសាអូឌីត​មែន​ ប៉ុន្តែក្រោយ​មកក៏បាន​ចេញ​ទៅវិញ។
ស្របពេលមាន​ការចេញមុខទទួល​ស្គាល់ថា លោក Khashoggi បានស្លាប់នៅ​ក្នុងស្ថានកុលស៊ុល​អារ៉ាប៊ីសាអីឌីត​នេះ ព្រះរាជាណាចក្រ​ប្រេងនៅមជ្ឈិមបូព៌ា​នេះ បាន​បណ្តេញ​លោក អាម៉េដ អាល់អាស្ស៊ឺរី (Ahmed al-Assiri) ដែលជាទីប្រឹក្សា​ជាន់ខ្ពស់របស់​​ព្រះ​អង្គ​ម្ចាស់ Mohammed bin Salman និងទីប្រឹក្សាព្រះរាជវាំង លោក Abdullah Al-Qahtani។ កាលពីម្សិលមិញនេះ ក៏មានសេចក្តី​រាយ​កាណ៍ព័ត៌មានពី The New York Times ផងដែរថា អារ៉ាប៊ីសាអូឌីត​នឹងឆ្លើយទម្លាក់​កំហុសលើ លោក Asiri ជុំវិញ​ការស្លាប់របស់​លោក Khashoggi ដើម្បីការពារព្រះរាជទាយាទរបស់ខ្លួន។

គួរជម្រាបថា បើតាម​ទីភ្នាក់ងារព័ត៌មាន​រដ្ឋអារ៉ាប៊ីសាអូឌីត ជនជាតិ​អារ៉ាប៊ីសាអូឌីត​ចំនួន ១៨នាក់ ក៏ត្រូវបានចាប់​ឃុំខ្លួនថែមទៀត​​ផង បន្ទាប់​ពីលទ្ធផលបឋម​នៃការស៉ើបអង្កេត​​បានបង្ហាញថា ពួកគេមានជាប់​ពាក់ព័ន្ធនឹង​សំណុំរឿង​នេះ៕