(កង់បេរ៉ា)៖ នាយករដ្ឋមន្ត្រីអូស្ត្រាលីលោក ស្តុត ម៉ូរីសុន (Scott Morrison) បានប្រកាសជាសាធារណថា លោកជំទាស់នឹងគំនិតចង់ឱ្យអូស្ត្រាលី ក្លាយជាប្រទេសកាន់របបសាធារណរដ្ឋ ជាមួយការបង្ហាញមោទនភាពរបស់លោក ក្នុងការគាំទ្ររបបរាជានិយមរួមជាមួយចក្រភពអង់គ្លេសសព្វថ្ងៃ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសុក្រ ទី១២ ខែតុលា ឆ្នាំ២០១៨។
លោក Morrison ធ្វើការកត់សម្គាល់បែបនេះ នៅមុនពេលការបំពេញព្រះរាជដំណើរទស្សនកិច្ចរបស់ព្រះម្ចាស់អង់គ្លេស Harry និងភរិយារបស់ទ្រង់គឺនាង មេហ្គាន ម៉ាខល (Meghan Markle) មកកាន់ប្រទេសអូស្រ្តាលី។ ថ្លែងនៅក្នុងបទសម្ភាសន៍ជាមួយ Sky News នៅថ្ងៃសុក្រនេះ លោកនាយករដ្ឋមន្ត្រីអូស្ត្រាលីបានលើកឡើងដូច្នេះថា «ខ្ញុំពិតជាគាំទ្រជាទីបំផុត ដល់របបរាជានិយមអាស្រ័យរដ្ឋធម្មនុញ្ញ ហើយខ្ញុំមិនចង់ឃើញអូស្ត្រាលី ក្លាយជាប្រទេសកាន់របបសាធារណរដ្ឋនោះទេ»។
គួររំលឹកថា៖ កាលពីឆ្នាំ១៩៩៩ អតីតនាយករដ្ឋមន្ត្រីអូស្ត្រាលី លោក Malcolm Turnbull ធ្លាប់បានដឹកនាំចលនាអ្នកសាធារណរដ្ឋនិយមអូស្រ្ដាលី ចូលរួមនៅក្នុងការបោះឆ្នោតប្រជាមតិមួយ ស្ដីពីការធ្វើវិសោធនកម្មរដ្ឋធម្មនុញ ដើម្បីត្រួសត្រាយផ្លូវឱ្យអូស្ត្រាលីក្លាយទៅជាប្រទេសកាន់របបសាធារណរដ្ឋ។ ប៉ុន្តែការបោះឆ្នោតប្រជាមតិនេះមិនបានទទួលបានជោគជ័យឡើយ៕
