ស្ត្រីរងគ្រោះមានឈ្មោះ ណារី ស៊ីសុតឌី ជាគ្រូបង្រៀនចូលនិវត្ត រស់នៅផ្ទះកើតហេតុតែម្នាក់ឯង ស្ថិតក្នុងភូមិសោមសៅ ឃុំឡះលាយ ស្រុកផារៈទ័ក ខេត្តសាកេត ។
ស្ត្រីរងគ្រោះបានប្រាប់ឱ្យដឹងថា នៅថ្ងៃកើតហេតុ វេលាកណ្ដាលអាធ្រាត្រ មានភ្លៀងធ្លាក់ខ្លាំង ។ ខណៈនោះអ្នកស្រី ក៏បានឮសំឡេងមនុស្សគោះទ្វារ ហើយស្រាប់តែជនសង្ស័យក៏បានសម្រុកមកដល់ក្នុងបន្ទប់អ្នកស្រីតែម្ដង ដោយចាប់ច្របាច់ក និងស្រាតសម្លៀកបំពាក់របស់អ្នកស្រីបម្រុងចាប់រំលោភ ។
ពេលនោះ ស្ត្រីរងគ្រោះព្យាយាមរើបម្រាស់ ធ្វើឱ្យជនសង្ស័យខឹង វាយចំនួន ៣ដៃតែម្ដង ។ ដោយសាតែស្ថានភាពតានតឹងខ្លាំង ជនរងគ្រោះក៏បានប្រើល្បិចធ្វើពុតជាស្លាប់ ធ្វើឱ្យជនសង្ស័យភ័យស្លន់ស្លោ រត់គេខ្លួនបាត់ស្រមោល ។
ក្រោយកើតហេតុ ជនរងគ្រោះក៏បានស្រែកហៅអ្នកជិតខាងឱ្យជួយ និងរាយការទៅប៉ូលិស ដើម្បីស្រាវជ្រាវតាមចាប់ខ្លួនជនសង្ស័យ មកដាក់ទោសតាមច្បាប់ ។
ប៉ូលិសបានឱ្យដឹងថា តាមការសន្និដ្ឋាន ជនសង្ស័យអាចជាអ្នកនៅក្នុងភូមិផងរបងជាមួយជនរងគ្រោះ ព្រោះគេស្គាល់ទីតាំងភូមិសាស្ត្រច្បាស់លាស់ក្នុងការរត់គេចខ្លួន តែទោះជាយ៉ាងណាក្ដី ក៏នៅតែព្យាយាមស្រាវជ្រាវចាប់ខ្លួនជនសង្ស័យមកផ្តន្ទាទោសឱ្យទាល់តែបាន ៕
