បើយោងតាមការកំណត់ក្នុងដីកាចុះថ្ងៃទី១៦ ខែសីហា ឆ្នាំ២០១៨, លោក សម រង្ស៊ី ត្រូវចូលទៅបំភ្លឺនៅតុលាការក្រុងភ្នំពេញនៅវេលាម៉ោង៩៖០០នាទីព្រឹក តាមការកំណត់ ហើយសាមីខ្លួន ត្រូវនាំយកនូវឯកសារផ្សេងៗ ដែលពាក់ពន័្ធនឹងរឿងខាងលើនេះ ទៅជាមួយផងប្រសិនបើមាន។
ដើមចមនៃបណ្តឹងនេះ បានកើតឡើង កាលពីខែមិថុនា ឆ្នាំ២០១៨ ដោយទណ្ឌិត សម រង្ស៊ី ដែលកំពុងរត់គេចទៅក្រៅប្រទេស បានប្រមាថថា ព្រះរាជសារព្រះមហាក្សត្រជាទីសក្ការៈ ចុះថ្ងៃទី១៨ ខែឧសភា ឆ្នាំ២០១៨ ដែលអំពាវនាវឱ្យប្រជាពលរដ្ឋទៅបោះឆ្នោត នាចុងខែកក្កដានោះ គឺជាព្រះរាជសារក្លែងក្លាយ និងគ្មានតម្លៃ ទោះបីជាព្រះបរមរាជវាំងចេញមុខប្រកាសថា ព្រះរាជសារនោះជាព្រះរាជសារ ពិតប្រាកដ មិនក្លែងក្លាយក៏ដោយ។
ការប្រមាថរបស់ លោក សម រង្ស៊ី បែបនេះ បានធ្វើឱ្យមានប្រតិកម្មយ៉ាងខ្លាំងពីបណ្តាគណបក្សនយោបាយ និងប្រជាពលរដ្ឋកម្ពុជា។
ពាក់ព័ន្ធនឹងករណីនេះ នាពេលកន្លងទៅតំណាងអយ្យការធ្លាប់កោះហៅ លោក សម រង្ស៊ី ចូលបំភ្លឺជាច្រើនដងមកហើយ ប៉ុន្តែទណ្ឌិតរូបនេះ ពុំបានចូលបំភ្លឺតាមការកោះហៅនោះទេ។ ប៉ុន្តែទោះជាយ៉ាងនេះក្តី តុលាការនៅតែបន្តនីតិវិធីរបស់ខ្លួនជាបន្តបន្ទាប់ទៀត៕
