(គូឡាឡាំពួរ)៖ អតីតនាយករដ្ឋមន្រ្តីម៉ាឡេស៊ី លោក Najib Razak ត្រូវបានចាប់ខ្លួនជាថ្មីម្តងទៀត ទាក់ទិននឹងរឿងពុករលួយ អាស្រូវមូលនិធិរដ្ឋ 1MDB ដោយការឃាត់ខ្លួនលើកនេះ គឺពាក់ព័ន្ធជាពិសេសទៅលើលុយចំនួន៦២៨លានដុល្លារ ដែលត្រូវគេ រកឃើញនៅក្នុងគណនីធនាគាររបស់លោក។ នេះបើតាមការដកស្រង់ការផ្សាយចេញពីសារព័ត៌មាន Channel News Asia នៅល្ងាចថ្ងៃពុធ ទី១៩ ខែកញ្ញា ឆ្នាំ២០១៨។
គណៈកម្មការប្រឆាំងអំពើពុករលួយម៉ាឡេស៊ី MACC បានឲ្យដឹងថា លោក Najib ត្រូវបានចាប់ឃាត់ខ្លួននារសៀលថ្ងៃពុធនេះ ហើយលោក នឹងត្រូវចូលខ្លួនក្នុងតុលាការទីក្រុងគូឡាឡាំពួរ នៅរសៀលថ្ងៃព្រហស្បតិ៍ស្អែកនេះ ដើម្បីប្រឈមមុខការចោទ ប្រកាន់មួយចំនួនថែមទៀត។
គួរជម្រាបថា លោក Najib បច្ចុប្បន្ន កំពុងប្រឈមនឹងការចោទប្រកាន់០៧ករណី ជុំវិញថវិកានៃអង្គការ SRC International ដែលធ្លាប់ជាផ្នែកមួយនៃមូលនិធិ 1MDB សរុបប្រមាណ១០លានដុល្លារ ក្នុងនោះ០៣ករណីទាក់ទិនបទរំលោភលើទំនុកចិត្ត ០៣ករណីទាក់ទិនការលាងលុយកខ្វក់ និង០១ករណីទាក់ទិនការរំលោភអំណាច ហើយមកទល់ពេលនេះ លោក Najib បានបន្តរក្សាភាពស្អាតស្អំរបស់ខ្លួនរហូតមក និងបាននិយាយថាការកាត់ក្តីរបស់លោក នាខែកុម្ភៈ ឆ្នាំ២០១៩ គឺជាឱកាសដ៏ល្អបំផុត ដើម្បីលុបលាងកេរ្តិ៍ឈ្មោះរបស់លោក៕
គួរជម្រាបថា មូលនិធិ 1MDB ត្រូវបានបង្កើតឡើងដោយលោក Najib កាលពីឆ្នាំ២០០៩ ដើម្បីជួយជំរុញការអភិវឌ្ឍសេដ្ឋកិច្ចម៉ាឡេស៊ី ប៉ុន្តែក្រោយមកមានសេចក្តីរាយការណ៍ថា លុយរាប់ពាន់លានដុល្លារនៅក្នុងនោះ ត្រូវបានកឹបកេង និងប្រើប្រាស់ដោយមិនត្រឹមត្រូវ។ លោក Najib បានស្ថិតក្រោមការស៊ើបអង្កេតទាក់ទិននឹងមូលនិធិ 1MDB ចាប់តាំងតែពីលោកបានចាញ់ឆ្នោតកាលពីខែឧសភា ប៉ុន្តែបានច្រានចោលការចោទប្រកាន់ទាំងអស់។
នៅក្រោយការបោះឆ្នោត នាយករដ្ឋមន្រ្តីម៉ាឡេស៊ីបច្ចុប្បន្នលោក មហាធា ម៉ូហាម៉េដ (Mahathir Mohamad) បានបង្កើនការប្រឹងប្រែងជាខ្លាំង ដើម្បីស៊ើបអង្កេតករណីនេះ៕
