កំពូលមហាសេដ្ឋីចិនលោក Jack Ma ប្រកាសថានឹងចូលនិវត្តពីក្រុមហ៊ុនយក្ស Alibaba នៅសប្តាហ៍ក្រោយ!
08/09/2018
(ហុងកុង)៖ សហស្ថាបនិកនៃក្រុមហ៊ុន Alibaba លោក ចេក ម៉ា (Jack Ma) បានប្រកាសថា រូបលោកបានគ្រោងនឹងចូលនិវត្តពីក្រុមហ៊ុនលក់ទំនិញតាមអនឡាញដ៏ធំសម្បើមនៅប្រទេសចិននេះ នាថ្ងៃចន្ទដើមសប្តាហ៍ក្រោយ ដើម្បីបង្វែរការយកចិត្តទុកដាក់ ទៅលើការបង្កើតមូលនិធិសប្បុរសធម៌ទាក់ទិននឹងវិស័យអប់រំវិញ។ នេះបើតាមការដកស្រង់ការផ្សាយចេញពីសារព័ត៌មានអាមេរិក New York Times នៅព្រឹកថ្ងៃសៅរ៍ ទី០៨ ខែកញ្ញា ឆ្នាំ២០១៨។
ដោយឡែកលោក Ma បានបញ្ជាក់ថា រូបលោកនឹងបន្តស្ថិតក្នុងគណៈប្រឹក្សាភិបាលរបស់ Alibaba ក៏ដូចជានឹងបន្តផ្តល់អនុសាសន៍ក្នុងកិច្ចការគ្រប់គ្រងក្រុមហ៊ុននេះដដែល។ លោក Jack Ma ដែលនឹងឈានចូលវ័យ ៥៤ឆ្នាំ នាថ្ងៃចន្ទសប្តាហ៍ក្រោយនេះ បានចាប់ផ្តើមក្រុមហ៊ុន Alibaba ឡើងកាលពីឆ្នាំ១៩៩៩ ហើយកសាងវាឲ្យក្លាយជាក្រុមហ៊ុនផ្នែកបច្ចេកវិទ្យាដ៏ធំបំផុតមួយនៅលើពិភពលោក ដែលបានជួយប្រែក្លាយរបៀបដែលប្រជាជនចិនទិញទំនិញ និងទូទាត់ថវិកា។
គួរជម្រាបថា បច្ចុប្បន្នក្រុមហ៊ុន Alibaba មានតម្លៃសរុប ៤២០ពាន់លានដុល្លារ ហើយលោក Ma ដែលធ្លាប់ជាគ្រូបង្រៀនភាសាអង់គ្លេសម្នាក់ផងដែរនោះ មានភាគហ៊ុន៦.៤ភាគរយនៅក្នុងនោះ ដែលជាហេតុធ្វើឲ្យទ្រព្យសម្បត្តិរបស់លោកមានតម្លៃជាង ៤០ពាន់លានដុល្លារ និងក្លាយជាអ្នកមានស្តុកស្តម្ភជាងគេបង្អស់នៅក្នុងប្រទេសចិន៕
