ប្រធានាធិបតីអ៊ីរ៉ង់៖ «វត្តមានខុសច្បាប់របស់កងទ័ពអាមេរិកនៅស៊ីរី គឺជាការបន្ថែមបញ្ហាឲ្យកាន់តែស្មុគស្មាញ»
07/09/2018
(តេហេរ៉ង់)៖ ប្រធានាធិបតីអ៊ីរ៉ង់ លោក Hassan Rouhani បាននិយាយថា សហរដ្ឋអាមេរិក គួរតែបញ្ឈប់វត្តមានដោយខុសច្បាប់របស់ខ្លួននៅស៊ីរី ហើយចាកចេញទៅវិញទៅ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅយប់ថ្ងៃសុក្រ ទី០៧ ខែកញ្ញា ឆ្នាំ២០១៨។
លោក Rouhani បានលើកឡើងថា តួនាទីដែលជះផលអវិជ្ជមាននិងគ្មានភាពស្ថាបនា របស់ទីក្រុងវ៉ាស៊ីនតោន បូករួមជាមួយការគាំទ្ររបស់អាមេរិកចំពោះអ៊ីស្រាអែល ក្នុងការដណ្តើមកាន់កាប់ទឹកដីនៅក្នុងតំបន់ គ្មានជួយអ្វីបានក្រៅតែពីថែមបន្ទុកបញ្ហាឲ្យកាន់តែស្មុគស្មាញប៉ុណ្ណោះនៅប្រទេសស៊ីរី។
គួរជម្រាបថា លោក Rouhani បានធ្វើការកត់សង្គាល់បែបនេះ នៅក្នុងកិច្ចប្រជុំត្រីភាគីជាប្រធានាធិបតីតួកគី និងប្រធានាធិបតីរុស្ស៊ី នៅឯរដ្ឋធានីតេហេរ៉ង់ ដើម្បីពិភាក្សាក៏ដូចជាស្វែងរកដំណោះស្រាយចំពោះបញ្ហាសំខាន់ៗ នៅស៊ីរី៕
