(ស្វីស)៖ កីឡាករ Kasper Schmeichel អ្នកចាំទីសញ្ជាតិដាណឺម៉ាក និងបច្ចុប្បន្នជាកីឡាកររបស់ក្លឹប Leicester City ដែលមានកម្ពស់ ១.៩០ម៉ែត្រ វ័យ ៣១ឆ្នាំបានធ្វើឲ្យមានការភ្ញាក់ផ្អើលជាខ្លាំង ដែលត្រូវបាន FIFA ជ្រើសរើស ដើម្បីដណ្តើមពានរង្វាន់អ្នកចាំទីល្អបំផុតប្រចាំឆ្នាំ២០១៨ (The Best FIFA Goalkeeper) ក្នុងចំណោម៣នាក់ចុងក្រោយជាមួយ Thibaut Courtois និង Hugo Lloris កាលពីពេលថ្មីនេះ។
កំណត់ត្រារបស់ Schmeichel កាលនៅព្រឹត្តិការណ៍ World Cup 2018 ដែលមានរុស្ស៊ីធ្វើម្ចាស់ផ្ទះរួមមាន៖
១៖ សង្គ្រោះការស៊ុតបញ្ជូលទី ពីក្រុមដទៃបាន ៩១% គិតត្រឹមស៊ុតចំគោលដៅ
២៖ សង្គ្រោះបាល់ ១១ម៉ែត្រ (ប៉េណាល់ទី) បាន ៣ដង នៅវគ្គ១៦ក្រុមចុងក្រោយ ពេលប្រកួតជាមួយក្រូអាត ដែលជាក្រុមរងជើងឯក World Cup។
៣៖ បានបង្កើតកំណត់ត្រាសម្រាប់ប្រទេសដាណឺម៉ាក មិនឲ្យមានការស៊ុតបញ្ចូលទី រហូតដល់ទៅ ៥៧២នាទី។
គួរបញ្ជាក់ផងដែរថា Schmeichel គឺជាកូនប្រុសរបស់អតីតអ្នកចាំទីឆ្នើម Peter Schmeichel ដែលមានប្រវត្តិជោគជ័យធំបំផុតនៅក្នុងលីគកំពូលអង់គ្លេស ក្នុងក្លឹប Manchester United ដែលបានចំណាយលេងឲ្យ ក្លឹបនេះ ៨ឆ្នាំ ស្ថិតក្រោមការដឹកនាំរបស់គ្រូបង្វឹក Sir-Alex Ferguson ដោយធ្លាប់ឈ្នះពាន Premier League ៥ដង ពាន FA Cup ៣ដង ពាន League Cup ម្តង និង UEFA Champions League បានម្តងដែរ ខណៈ Schmeichel ក៏ធ្លាប់ឈ្នះពាន Premier League ដូចគ្នា ជាមួយឳពុកនៅទឹកដីអង់គ្លេសនោះដែរ៕
