កុំ​ទិញ iPhone X ពេល​នេះ បើ​មិន​ចង់​ស្ដាយ​ក្រោយ

មុន​នឹង​ការ​ប្រកាស​ចេញ​ iPhone ជំនាន់​ថ្មី​​មួយ​ខែ សំនួរ​ដែល​​ឧស្សាហ៍​​​ឮ​ជាង​គេ​ "តើ​គួរ​រង់​ចាំ​ iPhone ស៊េរី​ថ្មី​ចេញ​សិន​ ឬ​​គួរ​ទិញ​ iPhone ​ស៊េរី​ចាស់​ដែល​ចេញ​បាន​ជិត​មួយ​ឆ្នាំ​ហើយ​នោះ?”។ ចម្លើយ​សម្រាប់​ឆ្នាំ​នេះ​ ប្រហែល​ជា​ច្បាស់​ជាង​រាល់​ឆ្នាំ​ គឺ​ "រង់ចាំ​សិន"។

មាន​ហេតុផល​សម​ទំនង​មួយ​ចំនួន​ ដែល​អ្នក​គួរ​រង់ចាំ​ ជា​ជាង​ទិញ​ iPhone ស៊េរី​ចាស់​ប្រើ​នា​ពេល​នេះ។ ហេតុផល​ដំបូង​គេ​គឺ​ ពេល​ iPhone ជំនាន់​ថ្មី​ចេញ​ អ្នក​មាន​ជម្រើស​​ថ្មី។

ត្រកូល​ iPhone នា​ពេល​បច្ចុប្បន្ន​មាន​ iPhone 8, iPhone 8 Plus និង iPhone X។ ​មាន​ដល់​ទៅ​ ៣ ប្រភេទ ប៉ុន្តែ​ជម្រើស​របស់​អ្នក​ប្រហែល​មាន​ដែន​កំណត់។ ចង់​បាន​អេក្រង់​ OLED? iPhone X ជា​ជម្រើស​តែ​មួយ​គត់។ ចង់​បាន​ Face ID? iPhone X ជា​ជម្រើស​តែ​មួយ​គត់។ ចង់​បាន​តម្លៃ​ធូរ​ថ្លៃ? iPhone 8 ដែល​​​ប្រើ​រចនាបថ​ចាស់​គំរឹល​ ជា​ជម្រើស​តែ​មួយ​គត់។

សម្រាប់​ iPhone ជំនាន់​ថ្មី​ នឹង​មាន​ការ​ផ្លាស់​ប្ដូរ​ជា​ច្រើន។ iPhone ថ្មី​ទាំង​បី​​នឹង​មាន​ប្រើ​មុខងារ​ Face ID ហើយ​មាន​ពីរ​ប្រើ​អេក្រង់​ OLED។ មួយ​ប្រភេទ​ទៀត​ប្រើ​អេក្រង់​ LCD មាន​តម្លៃ​ធូរ​ថ្លៃ ប៉ុន្តែ​មាន​រចនាបថ​ដូច​ iPhone X។

បន្ថែម​ពី​នេះ ការ​ប្រកាស​ចេញ​ iPhone ថ្មី​ មាន​ន័យ​ថា​ iPhone ចាស់ៗ​នឹង​មាន​តម្លៃ​ធូរ​ថ្លៃ​ជាង​មុន។ របាយការណ៍​បាន​សន្និដ្ឋាន​ថា​ iPhone X ដែល​ចេញ​ឆ្នាំ​ ២០១៨ នឹង​មាន​​តម្លៃ​​ចាប់​ផ្ដើម​ពី​ ៨៩៩ ដុល្លារ ចំណែក​ iPhone X Plus មាន​តម្លៃ​ចាប់​ផ្ដើម​ពី ៩៩៩ ដុល្លារ។

នេះ​មាន​ន័យ​ថា​ iPhone បច្ចុប្បន្ន​ ពោល​ iPhone X នឹង​មាន​តម្លៃ​ថោក​ជាង​មុន។ ត្បិត​ថា​ពេល​នេះ​ គេ​មិន​ច្បាស់​ថា​ Apple នឹង​​មាន​ដំណោះ​ស្រាយ​បែប​ណា​ជា​មួយ​ iPhone X ពេល​ iPhone X ជំនាន់​ថ្មី​ប្រកាស​ចេញ។ ប៉ុន្តែ​ហាង​លក់​រាយ​ដែល​មាន​ iPhone X ស៊េរី​ចាស់​នៅ​ក្នុង​ស្តុក​ អាច​នឹង​បន្ថយ​តម្លៃ​លក់​ iPhone X ស៊េរី​ចាស់​ដើម្បី​ឲ្យ​អស់​ពី​ស្តុក ពោល​អាច​មាន​តម្លៃ​ក្រោម​ ៨០០ ដុល្លារ។

បញ្ជាក់​ថា​ នេះ​មិន​មែន​ជា​ការ​ណែនាំ​ឲ្យ​អ្នក​រង់ចាំ​​ទិញ​​​ iPhone ស៊េរី​ចុង​ក្រោយ​នោះ​ទេ។ ប៉ុន្តែ​ប្រសិន​បើ​អ្នក​អាច​រង់ចាំ​ប៉ុន្មាន​សប្ដាហ៍​ទៀត​ អ្នក​នឹង​មាន​ជម្រើស​ជា​ច្រើន​ ជា​មួយ​តម្លៃ​ខុសៗ​គ្នា៕​​​​​ ​​​​​​​​




ប្រភព៖ 9to5Mac