ភ្លើងឆេះព្រៃនៅប្រទេសក្រិក «ផ្តាច់ជីវិតមនុស្សកើនដល់៥០នាក់ និងជាង១៥០នាក់របួស»
24/07/2018
(អាតែន)៖ អាជ្ញាធរក្រិកនៅល្ងាចថ្ងៃអង្គារនេះបានឱ្យដឹងថា ភ្លើងឆេះព្រៃដែលកំពុងវាយលុកស្ទើរទាំងទូទាំងប្រទេស បានសម្លាប់មនុស្សកើនឡើងដល់ ៥០នាក់ និងជាង ១៥០នាក់ផ្សេងទៀតរងរបួស។ នេះបើតាមការចេញផ្សាយដោយសារព័ត៌មាន BBC នៅល្ងាចថ្ងៃអង្គារ ទី២៤ ខែកក្កដា ឆ្នាំ២០១៨។
រដ្ឋាភិបាលក្រិកបានបញ្ជូនក្រុមអ្នកពន្លត់អគ្គីភ័យរាប់រយនាក់ ទៅកាន់តំបន់រងគ្រោះ ដើម្បីប្រយុទ្ធនឹងភ្លើងឆេះព្រៃ និងជួយជម្លៀស ប្រជាជននៅក្បែរទីក្រុងអាតែន ទៅកាន់ទីទួលមានសុវត្ថិភាព។ ចំណែកចំនួនខាងលើ អាចនឹងមានការកើនឡើងជាបន្តបន្ទាប់ទៀត ខណៈមានសេចក្តីរាយការណ៍ថាមានមនុស្សបាត់ខ្លួន។
គួរបញ្ជាក់ថា ដោយសារតែភ្លើងឆេះព្រៃនេះនាយករដ្ឋមន្ត្រីក្រិក លោក អាឡិចស៊ីស តាស៊ីប្រាស់ (Alexis Tsipras) បានលុបចោលដំណើរទស្សនកិច្ចទៅកាន់ប្រទេសបូស្នី ដើម្បីជួយសម្របសម្រួលប្រតិបត្តិការជួយសង្រ្គោះ និងស្វែងរកជំនួយពីអន្តរជាតិ៕
