បន្ទាប់ពីបញ្ចេញស្មាតហ្វូនធន់កណ្ដាល(កម្រិតថវិការ)ដែលមានបន្តគ្នាដូចជា Huawei Nova3, Nova 3E ឬ P20 Lite។ កាលពីពេលថ្មីៗនេះ Huawei ប្រចាំនៅហ្វីលីពីន បានបង្ហើបឲ្យពីដំណឹង Nova 3i ជំនាន់ថ្មីដែលបំពាក់មកជាមួយបន្ទះឈីបលេខខ្ពស់ និងបំពាក់មកជាមួយបច្ចេកវិទ្យាទំនើបជាច្រើនមិនឲ្យចាញ់សិស្សច្បងមុនៗនោះទេ។
នៅលើគេហទំព័រផ្លូវការ
Huawei ប្រចាំនៅហ្វីលីពីន បានឲ្យដឹងថា Nova 3i នឹងបំពាក់មកជាមួយបន្ទះឈីប Kirin 710 អាចមាន RAM 4GB ឯកាមេរ៉ាខាងក្រោយភ្លោះទំហំ ១៦+២ មេហ្គាភិចសែល កាមេរ៉ាមុខភ្លោះទំហំ ២៤+ ២ មេហ្គាភិចសែល។
ស្មាតហ្វូននេះមានអេក្រង់ទំហំ ៦,៣ អ៊ីញប្រភេទ LCD អាចបង្ហាញរូបភាពបានកម្រិត FullHDដូចទៅនឹង Nova 3 ដែរ។ ជាងនេះទៀត Nova 3i ជាស្មាតហ្វូនដំបូងគេរបស់ Huawei ដែលប្រើបន្ទះឈីប Kirin 710 SoC ដែលមានមានវិមាត្រ ១២ ណាណូម៉ែត្រផលិតដោយក្រុមហ៊ុន HiSilicon។
ទំហំផ្ទុកក្នុងម៉ាស៊ីនរបស់ Nova 3i មាន ១២៨ GB អាចថែមមេម៉ូរីក្រៅបានដល់ ២៥៦ GB។ ដំណើរការដោយ Android Oreo 8.1 ជាមួយនឹង UI របស់ Huawei គឺ EMUI 8.1 ចេញពីប្រអប់។
លើសពីនេះ មុខងារ AI ដែលធ្លាប់បំពាក់លើកាមេរ៉ាត្រកូល Nova ពីមុនក៏រក្សាទុកនៅដដែល និងកែប្រែលើចំណុចខ្លះ មានន័យថា ធ្វើឲ្យកម្រិតចាប់យករូបភាពរបស់វា កាន់តែខ្លាំង និងសំគាល់បានលឿនជាងមុន។
Nova 3i មានថាមពលថ្ម ៣៣៤០ មីលីអំពែម៉ោង មានរន្ធដោតកាសប្រភេទ MicroUSB តែគ្មានបច្ចេកវិទ្យាសាកថ្មលឿននោះទេ។ ចំណែកពណ៌មាន ៣ គឺ ពណ៌ខ្មៅ ពណ៌ស និងពណ៌ស្វាយ។
Nova 3i ត្រូវបានដាក់ឲ្យកម្ម៉ង់ទិញហើយនៅលើគេហទំព័រផ្លូវការ Huawei ប្រចាំនៅហ្វីលីពីន ចាប់ពីថ្ងៃទី ១៩ រហូតដល់ថ្ងៃទី ២៧ ខែកក្កដា។ ការកម្ម៉ង់ទិញនោះមានបន្ថែមកាស Blutooth មួយដែលមានតម្លៃខ្ទង់ ៥៥ ដុល្លារ ចំណែកឯ Nova 3i មានតម្លៃប្រមាណជា ៣០០ ដុល្លារ៕
ប្រភព៖
GSMarena
