ខេត្តរតនគីរី៖ បុរសល្មោភកាមម្នាក់កំពុងជិះម៉ូតូដើរទិញអេតចាយ ស្រាប់តែប្រទះឃើញក្មេងស្រីដើេរចេញពីចម្ការតែម្នាក់ឯង ក៏ឈប់ម៉ូតូស្ទាក់ ចាប់អូសដៃរបស់នាង នាំទៅចាប់រំលោភ នៅក្នុងរហូតដល់បានសម្រេច ហើយគេចខ្លួនបាត់ បង្កឱ្យភ្ញាក់ផ្អើលឡើង កាលពីរសៀលថ្ងៃទី១៤ ខែកក្កដា ឆ្នាំ២០១៨ នៅក្នុងចម្ការស្វាយចន្ទីមួយកន្លែង ស្ថិតក្នុងភូមិទុស ឃុំតាអង ស្រុកកូនមុំ។
ក្មេងស្រីរងគ្រោះ ឈ្មោះ ស ល អាយុ១៣ឆ្នាំ ជនជាតិភាគតិចគ្រឹង មុខរបរជួយធ្វើចម្ការជាមួយនឹងឪពុកម្តាយ មានលំនៅក្នុងភូមិឃុំកើតហេតុខាងលើ។ រីឯជនសង្ស័យល្មោភកាមនោះ គឺមិនទាន់ស្គាល់ពីអត្តសញ្ញាណនៅឡើយ ប៉ុន្តែគេគ្រាន់តែដឹងថា ជននេះគឺជាអ្នកប្រកបរបរដើរទិញអេតចាយ។
ក្មេងស្រីរងគ្រោះ បានឲ្យដឹងថា មុនពេលកើតហេតុ នាងទើបនឹងចេញពីចម្ការតែម្នាក់ឯង ក្នុងគោលបំណងត្រឡប់ទៅផ្ទះវិញ។ លុះពេលនាងដើរមកដល់ចំណុចចម្ការស្វាយចន្ទី ដែលជាកន្លែងស្ងាត់ ស្រាប់តែលេចមុខជនសង្ស័យជិះម៉ូតូដើរទិញអេតចាយមកដល់ ហើយឈប់ម៉ូតូ រួចស្ទុះមកចាប់ដៃរបស់នាងអូសចូលទៅក្នុងព្រៃ ចាប់នាងរំលោភសេពសន្ថវៈ រហូតដល់បានសម្រេច។
ក្រោយពេលកើតហេតុ អាណាព្យាបាលបាននាំក្មេងស្រីរងគ្រោះទៅដាក់ពាក្យបណ្ដឹង សុំឲ្យសមត្ថកិច្ចតាមស្រាវជ្រាវ ស្វែងរកចាប់ខ្លួនជនសង័្សយ នាំមកផ្ដន្ទាទោសតាមច្បាប់។