ប្រភពព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ ជនរងគ្រោះទាំង២នាក់ប្ដីប្រពន្ធកំពុងតែដេកលង់លក់ នៅក្នុងដំណេក ស្រាប់តែភ្លើងបានឆេះផ្ទះយ៉ាងសន្ធោសន្ធៅ ធ្វើឲ្យភ្ញាក់ផ្អើលដល់អ្នកភូមិ នាំគ្នារត់ទៅជួយពន្លត់ភ្លើង។ រីឯជនរងគ្រោះត្រូវភ្លើងឆាបឆេះយ៉ាងសន្ធោសន្ធៅទៅហើយ ក៏ប្រញាប់នាំគ្នាជួយដងទឹកជះពន្លត់។
ចំណែកខ្លះទៀតបានទាក់ទងសុំធ្វើអន្តរាគមន៍ពីសមត្ថកិច្ចមូលដ្ឋាន ហើយសមត្ថកិច្ចក៏ទាក់ទងបន្តសុំអន្តរាគមន៍ពីរថយន្តពន្លត់អគ្គិភ័យ។ ប៉ុន្តែដោយសារតែស្ថានភាពផ្លូវមានការលំបាក ទើបធ្វើឱ្យការចុះមកជួយអន្តរាគមន៍បាញ់ទឹកពន្លត់មានការយឺតយ៉ាវ បណ្តាលឱ្យផ្ទះទាំងមូលត្រូវភ្លើងឆេះគ្មានសល់។ ចំណែកជនរងគ្រោះទាំង២នាក់ប្តីប្រពន្ធ ទំនងជាដេកលង់លក់ មិនដឹងភ្លើងឆេះ លុះពេលភ្ញាក់ដឹងខ្លួនភ្លើងឆេះពេញបន្ទុករកផ្លូវចេញមិនឃើញ ទើបបណ្តាលឱ្យត្រូវឆេះស្លាប់ក្នុងភ្នក់ភ្លើងយ៉ាងអាណោចអាធ័ម បែបនេះតែម្តង។
ក្រោយកើតហេតុ សមត្ថកិច្ចបានចុះអន្តរាគមន៍ដល់ទីតាំងកើតហេតុ និងបានបញ្ជាក់ថា មូលហេតុដែលនាំឱ្យកើតមានអគ្គិភ័យនេះ សមត្ថកិច្ចនៅមិនទាន់អាចសន្និដ្ឋានបាននៅឡើយ និងកំពុងស្ថិតក្នុងការស្រាវជ្រាវ។
