ប្រទេសថៃ៖ ការរុករកយុវសិស្ស១២នាក់ និងគ្រូបង្ហាត់បាល់ទាត់ម្នាក់ ដែលបាត់ខ្លួនក្នុងរូងភ្នំថាំហ្លួង នៅតែជារឿងក្តៅកក្រើកប្រទេសថៃ និងប្រទេសនានា រហូតមានការបញ្ជូនក្រុមអ្នកជំនាញរុករកនិងឧបករណ៍មុជទឹក ព្រមទាំងសម្ភារជំនួយនានាទៅជួយរកដែរ តែរហូតមកដល់ម៉ោងនេះ នៅតែលទ្ធផលសូន្យដដែល ។ក្រៅពីការរុករកគ្រប់ច្រកល្ហកក្នុងរូងភ្នំ ក្រុមអ្នកមានជំនឿទៅលើបារមីផ្សេងៗ ក៏នាំគ្នាបួងសួងបន់ស្រន់នៅមាត់រូងភ្នំនោះផងដែរ ។
ទោះបីជាបែបណា ប្រភពព័ត៌មានខ្លះនៅតែអះអាងថា ពួកគេអាចនៅរស់ដោយផ្អែកលើមូលហេតុជាច្រើន ថ្វីបើការបាត់ខ្លួនក្នុងរូងភ្នំនេះមានរយៈពេលជាង១សប្តាហ៍មកហើយក្តី ។ពេលនេះ ទឹកក្នុងរូងភ្នំចាប់ស្រកចុះច្រើនដោយការខិតខំប្រឹងប្រែងបូម ហើយភ្លៀងផ្អាកធ្លាក់ ។ ពួកអ្នកជួយសង្គ្រោះដែលប្រមូលផ្ដុំគ្នាចាប់តាំងពី៨ថ្ងៃមកហើយនោះ នៅថ្ងៃទី៣០ ខែមិថុនា បានចូលដល់កៀកតំបន់ដែលសន្មតថា យុវសិស្ស១២នាក់និងគ្រូបង្ហាត់បាល់ទាត់ពួកគេជាប់ក្នុងរូងភ្នំទឹកជន់លិច ហើយរត់ទៅជ្រក។
អភិបាលខេត្តឈៀងរ៉ៃលោក Narongsak Osottanakorn ថ្លែងថា ពួកអ្នកមុជទឹកពេលនេះស្ថិតនៅចម្ងាយប្រមាណ២គីឡូម៉ែត្រពីកន្លែងសន្មតថា ពួកគេរត់ទៅជ្រក ហើយយើងអាចចូលដល់ទីនោះនាថ្ងៃទី៣ ខែកក្កដា ។សភាពការណ៍ពេលនេះប្រសើរជាងពេលមុន ព្រោះទឹកចាប់ស្រកចុះច្រើន ដោយសារការបូមនិងភ្លៀងលែងធ្លាក់ ។ទោះបីជាយ៉ាងណា គេនៅពុំទាន់មានការទាក់ទងណាមួយជាមួយក្មេងទាំងនោះ និងគ្រូបង្ហាត់បាល់ទាត់ពួកគេដែលជាប់ក្នុងរូងភ្នំថាំហ្លួង មានភូមិសាស្ត្រក្បែរព្រំដែនប្រទេសមីយ៉ាន់ម៉ា និងឡាវ ចាប់តាំងពីថ្ងៃទី២៣ ខែមិថុនាមក នៅឡើយទេ ។ ប្រអប់ស្បៀងទាំងឡាយព្រមទាំងទូរស័ព្ទដៃ ត្រូវបានទម្លាក់មុននេះចូលក្នងរូងភ្នំពីប្រហោងត្រង់មួយនៃរូងភ្នំ ស្ថិតនៅមិនឆ្ងាយប៉ុន្មានពីកន្លែងដែលពួកអ្នកសង្គ្រោះសង្ឃឹមថាពួកគេប្រហែលជាជ្រកនៅទីនោះ ។