ថ្លែងរំលឹកយ៉ាងដូច្នេះធ្វើឡើងក្នុងឱកាសម្តេចតេជោ ហ៊ុន សែន អញ្ជើញជាអធិបតីភាពបើកការដ្ឋានសាងសង់ស្ពានអាកាស និងផ្លូវក្រោមដីរង្វង់មូលចោមចៅ ដែលត្រូវចំណោយប្រមាណ២២លានដុល្លារអាមេរិក ដើម្បីសម្រួលដល់ការធ្វើចរាចរប្រចាំថ្ងៃ របស់ប្រជាពលរដ្ឋ។
សម្តេចតេជោ ហ៊ុន សែន ថ្លែងយ៉ាងដូច្នេះថា «សូមរំលឹកដល់ក្រុមហ៊ុននានា និងក្រសួងពាណិជ្ជកម្ម ក៏ដូចជាផ្នែកពាក់ព័ន្ធទាំងអស់ សូមកុំភ្លេចថា ថ្ងៃនេះថ្ងៃទី២៩ ខែមិថុនាហើយ ស្អែកថ្ងៃ៣០ ថ្ងៃខានស្អែក គឺថ្ងៃទី១ ខែកក្កដា គឺជាថ្ងៃតម្លៃប្រេងទាំងអស់ នៅតាមស្ថានីយត្រូវចុះថ្លៃ១៦០រៀល...ត្រូវចាត់ចែងឲ្យច្បាប់ នេះ ជាការគិតគូររបស់រាជរដ្ឋាភិបាល ដែលត្រូវសហការជាមួយវិស័យឯកជន។ ខាងផ្នែករាជរដ្ឋាភិបាលត្រូវបង់ថ្លៃក្នុងរង្វង់៣០លានដុល្លារ ដើម្បីទម្លាក់ថ្លៃប្រេងក្នុងមួយលីត្រ២សេនដុល្លារ ស្មើនឹង៨០រៀល ឯវិស័យឯកជនត្រូវចុះតម្លៃ២សេនដូចគ្នា ដើម្បីផ្តល់ផលប្រយោជន៍ សម្រាប់ប្រជាពលរដ្ឋដែលប្រើប្រាស់ប្រេងឥន្ធនៈ»។
សម្តេចតេជោ ហ៊ុន សែន បានថ្លែងការ វិធានការណ៍បញ្ចុះតម្លៃសាំងនេះ គឺជាការយកចិត្តទុកដាក់របស់រាជរដ្ឋាភិបាលកម្ពុជា ចំពោះជីវភាពរបស់ប្រជាជនដើម្បីឲ្យពួកគាត់កាន់តែមានជីវភាពធូរធា។
សម្ដេចតេជោនាយករដ្ឋមន្ត្រីកាលពីពេលថ្មីៗកន្លងមកនេះធ្លាប់បានថ្លែងថា គ្រាន់តែរយៈពេល៥ខែ ដើមឆ្នាំ២០១៨នេះ រាជរដ្ឋាភិបាល បានធ្វើការឧបត្ថម្ភទុនដោយស្ងាត់ស្ងៀម សម្រាប់រក្សានូវថ្លៃប្រេងនៅកម្ពុជាកុំឱ្យឡើង ដោយឲបញ្ចេញថវិកាជិត ៨៣លានដុល្លារអាមេរិក ប៉ុន្តែវិធានការនេះមិនគ្រប់គ្រាន់ទេ ពោលគឺត្រូវមានវិធានការបន្ថែមទៀត ដូចជា ទី១. កំណត់មូលដ្ឋាននៃការគិតពន្ធប្រេង ដោយធៀបទៅនឹងតម្លៃទីផ្សារអន្តរជាតិ និងទី២. បញ្ចុះអាត្រាអាករពិសេសចំពោះប្រេងសាំងពី ៣៥% មក ១៥% ប្រេងម៉ាស៊ូតពី ១៥% មក ៥.៥% និងប្រេងកាតពី ១៥% មក ១០%។ សម្ដេចបន្តថា តាមរយៈវិធានការនេះ រដ្ឋនឹងត្រូវខាតបង់ថវិកាក្នុងមួយឆ្នាំ ៣០លានដុល្លារអាមេរិកបន្ថែមទៀត ជាមួយនឹងការឧបត្ថម្ភទុនដោយស្ងាត់ស្ងៀម៕
