ភ្នំពេញ៖ សេចក្ដីរាយការណ៍បានឱ្យដឹងថា ប្រជាពលរដ្ឋ២៩២គ្រួសារ នឹងដាក់ញត្តិស្នើសុំអន្តរាគមន៍ទៅសម្តេចតេជោនាយករដ្ឋមន្ត្រី ឲ្យជួយរកយុត្តិធម៌ ពួកគាត់។
ដើម្បីបញ្ចប់ការផ្តល់ប័ណ្ណកម្មសិទ្ធិជាស្ថាពរលើទំហំដីចំនួន៤៥០ហិចតា ក្នុងសង្កាត់ព្រែកហូរ ក្រុងតាខ្មៅ និង ឃុំកណ្តោក , ឃុំជើងកើប ស្រុកកណ្តាលស្ទឹង ខេត្តកណ្តាល។
ដែលការផ្តល់ប័ណ្ណកម្មសិទ្ធិនេះ ត្រូវបានរាំងស្ទះដោយសារក្រុមហ៊ុនហេង អភិវឌ្ឍន៍ របស់លោកស្រីឧកញ៉ា សៀង ចាន់ហេង រំលោភលើដីប្រជាពលរដ្ឋ ។ ប៉ុន្ដែលោកស្រី ឧកញ៉ា សៀងចាន់ បានបដិសេធការចោទប្រកាន់នេះ។ប្រភពព័ត៌មានឲ្យដឹងថា នៅព្រឹកថ្ងៃ២៥ ខែមិថុនា ស្អែកនេះ វេលាម៉ោង៧ព្រឹក ក្រុមប្រជាពលរដ្ឋតំណាងទាំង២៩២គ្រួសារ នឹងដាក់ញត្តិស្នើសុំអន្តរាគមន៍ទៅខុទ្ទកាល័យសម្តេចនាយករដ្ឋមន្ត្រី ក្បែរវិមានឯករាជ្យ ហើយនឹងបន្តដំណើរទៅដាក់ញត្តិមួយផ្សេងទៀតទៅលោកទេសរដ្ឋមន្រ្តី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ ។
ប្រជាពលរដ្ឋ ធ្លាប់និយាយថា ពួកគាត់បានមកអាស្រ័យផលលើដីនេះ តាំងពីឆ្នាំ១៩៨៧ មកម៉្លេះ ហើយក្រោយមកមានកំណើនច្រើនសរុប២៩២គ្រួសារ គឺ នៅឆ្នាំ១៩៩៣ ។ នៅឆ្នាំ២០០៤ ស្រាប់តែក្រុមហ៊ុន ហេង អភិវឌ្ឍន៍ របស់លោកស្រីឧកញ៉ា សៀង ចាន់ហេង មកប្ដឹងពួកគាត់ថា បានកាន់កាប់ដីរបស់ក្រុមហ៊ុនដោយខុសច្បាប់ តែតុលាការខេត្តកណ្ដាល កាត់ក្ដីឱ្យពលរដ្ឋឈ្នះក្ដីនេះ នៅឆ្នាំ២០០៦ ។
រយៈពេលជិតមួយឆ្នាំបន្ទាប់មក ស្រាប់តែមានលិខិតមកបញ្ជាក់ជាថ្មីថា ដីនេះ ជាកម្មសិទ្ធិរបស់លោកស្រីឧកញ៉ាសៀង ចាន់ហេង ទៅវិញ ។ មកដល់ឆ្នាំ២០០៩ ក្រុមហ៊ុនបានយកកម្លាំងអាវុធហត្ថប្រដាប់ដោយកាំភ្លើងគ្រប់ដៃ អមជាមួយគ្រឿងចក្រធុនយក្ស បានមកកម្ទេចដំណាំរបស់ពួកគាត់ ភ្លាមនោះក៏មានការតវ៉ាបានកើតឡើង ភ្លាមនោះដែរ ស្នូរកាំភ្លើងបាញ់រះតម្រង់មកប្រជាជន បណ្ដាលឱ្យមនុស្សរបួសពីរនាក់ ។ ប៉ុន្តែរហូតមកទល់ពេលនេះ អាជ្ញាធរបានផ្អាកការផ្តល់ប័ណ្ណកម្មសិទ្ធិជូនប្រជាពលរដ្ឋ ព្រោះតែក្រុមហ៊ុនហេង អភិវឌ្ឍន៍ បានរំលោភលើដីនេះយ៉ាងកម្រោល ដែលធ្វើជីវភាពរបស់ពួកយើងខ្ញុំ ខ្សត់ខ្សោយ ព្រោះតែមិនអាចអាស្រ័យផលលើដីទាំងនេះបានឡើយ ។
ក្រុមប្រជាពលរដ្ឋ ជឿជាក់និងសង្ឃឹមយ៉ាងមុតមាំ ថា សម្តេចតេជោ ពិតជាអាចជួយអន្តរាគមន៍ដល់ពួកគាត់បាន។ពាក់ព័ន្ធករណីនេះ លោកស្រី ឧកញ៉ា សៀងចាន់ អគ្គនាយិកាក្រុមហ៊ុនហេង អភិវឌ្ឍន៍ បដិសេធការចោទប្រកាន់នេះ ។
ដោយលោកស្រី អះអាងថា លោកស្រីនឹងលាតត្រដាងកាពិតនៅចំពោះមុខ អាជ្ញាធរដែនដីនិងស្ថាប័នមានសមត្ថកិច្ច ដើម្បីរកការពិតនិងដើម្បីជួយវែកមុខ។
ក្រុមខិលខូចដែលតែងតែបង្កអុកឡុកសង្គមដោយក្រោមពាក្យស្លោកថា ចាញ់បានលុយ ព្រោះពួកនោះប្រហែលជាមានមេក្លោងនៅពីក្រោយយ៉ាងច្បាស់។