កីឡាករនៃក្រុមបាល់ទាត់ជម្រើសជាតិរុស្ស៊ី ហ្វឹកហាត់ត្រៀមសម្រាប់ការប្រកួត World Cup ថ្ងៃនេះ។
ក្រុមរបស់លោក Stanislav Cherchesov នឹងធ្វើដំណើរទៅកាន់ទីលាននៃកីឡដ្ឋាន Luzhniki ដែលអាចផ្ទុកអ្នកទស្សនាបាន ៨ ម៉ឺននាក់ និងជាទីលានប្រវត្តិសាស្ត្ររបស់រុស្ស៊ី ក្នុងនាមជាក្រុមស្ថិតក្នុងចំណាត់ថ្នាក់លេខ ៧០ ក្នុងពិភពលោក ដោយតាមពីក្រោយគូប្រជែងស្ថិតក្នុងពូល A អារ៉ាប៊ីសាអ៊ូឌីត ៣ ចំណាត់ថ្នាក់ ហើយរុស្ស៊ី ក៏មិនស្គាល់ឈ្នះសោះផងដែរក្នុងរយៈពេល ៨ ខែកន្លងមកនេះ។ ការបញ្ចប់ក្នុងលទ្ធផលស្មើ ១-១ ក្នុងទីក្រុងម៉ូស្គូ ជាមួយនឹងក្រុមជម្រើសជាតិតួកគី កាលពីសប្តាហ៍មុន បានធ្វើឲ្យអតីតអ្នកចាំទីអន្តរជាតិរុស្ស៊ីលោក Cherchesov ក្លាយជាអ្នកចាត់ការទូទៅរបស់រុស្ស៊ី ឬសហភាពសូវៀតដំបូងគេ ក្នុងការមិនស្គាល់ឈ្នះសោះក្នុងការប្រកួត ៧ លើកជាប់ៗគ្នា ក្នុងនោះ ៤ ប្រកួតបញ្ចប់ដោយការចាញ់។
រុស្ស៊ីបានចំណាយប្រាក់ច្រើនជាង ១៣ ពាន់លានដុល្លារអាមេរិក ទៅលើការត្រៀមលក្ខណៈផ្សេងៗសម្រាប់ព្រឹត្តិការណ៍ដ៏ធំនេះ ហើយលោកប្រធានាធិបតី Vladimir Putin បានអំពាវនាវឲ្យក្រុមជម្រើសជាតិសាមគ្គីគ្នា ខណៈដែលពួកគេសម្លឹងរកការឆ្លងឲ្យផុតពូលដែលក៏មានក្រុមជម្រើសជាតិអ៊ុយរូហ្គាយ និងអេហ្ស៊ីប ផងដែរនោះ។ លោក Putin បានឲ្យដឹងថា៖ «នៅពេលដែលក្រុមនេះមានការបារម្ភខ្លាំង ខ្ញុំត្រូវតែដឹងថា ជាអកុសល ក្រុមរបស់យើងមិនបានសម្រេចនូវលទ្ធផលធំៗឡើយក្នុងពេលថ្មីៗនេះ»។
លោកបានបន្ថែមទៀតថា៖ «ប៉ុន្តែ យើងពិតជាមានការរំពឹងទុកខ្ពស់ ដូចរាល់អ្នកគាំទ្រ និងអ្នកស្រឡាញ់កីឡាបាល់ទាត់រុស្ស៊ីទាំងអស់ដែរ។ យើងរំពឹងទុកថា ក្រុមនេះនឹងលេងប្រកបដោយភាពថ្លៃថ្នូរ ហើយសម្រាប់ពួកគេ វាជាការបង្ហាញភាពជាកីឡាបាល់ទាត់សម័យទំនើប និងចាប់អារម្មណ៍ ហើយត្រូវប្រយុទ្ធដល់ទីបំផុត»។
Igor Akinfeev ដែលជាកីឡាករបាល់ទាត់ដ៏គួរឲ្យទទួលស្គាល់បំផុតរបស់រុស្ស៊ី និងជាអ្នកចាំទីជម្រើសទី ១ អស់រយៈពេលច្រើនជាង ១ ទសវត្សរ៍កន្លងមកនេះ ទទួលស្គាល់ថា មិត្តរួមក្រុមរបស់គេត្រូវតែបង្ហាញពីភាពខ្លាំងលើគូប្រកួតរបស់ខ្លួន។ ក្រោយពីចាញ់ក្រុមជម្រើសជាតិអូទ្រីស ១-០ កាលពីខែមុន ដែលកាលនោះ រុស្ស៊ី មិនមានឱកាសស៊ុតបាល់សំដៅទី សូម្បីតែ ១ លើក Akinfeev បានឲ្យដឹងថា៖ «ក្រុមនេះត្រូវតែបង្ហាញសមត្ថភាព និងលេងឲ្យល្អ។ ប្រសិនបើពួកគេមិនអាចធ្វើបាន ពិន្ទុនឹងមិនមានការផ្លាស់ប្តូរឡើយ»។
Akinfeev ដែលជាប្រធានក្រុមរបស់រុស្ស៊ី បានលេងការប្រកួតជាច្រើនសម្រាប់ក្លិប និងប្រទេសរបស់គេ ពោលគឺច្រើនជាងអតីតអ្នកចាំទីដ៏ឆ្នើមជំនាន់សហភាពសូវៀតគឺ Lev Yashin និង Rinat Dasayev ទៅទៀត។
ប៉ុន្តែ ការពឹងផ្អែករបស់ក្រុមទៅលើអ្នកចាំទីវ័យ ៣២ ឆ្នាំរូបនេះ ដែលបានលេងការប្រកួតក្របខ័ណ្ឌ Champions League ៤៣ ប្រកួត ប៉ុន្តែ មិនបានការពារមិនឲ្យមានគ្រាប់បាល់ចូលទីរបស់ខ្លួនសូម្បីតែ ១ លើករហូតដល់ ១១ ឆ្នាំនោះ បង្ហាញពីកម្រិតនៃឱកាសរបស់ក្រុមម្ចាស់ផ្ទះមួយនេះរួចជាស្រេច។
នេះគឺជាការបង្ហាញខ្លួនជាលើកទី ៤ របស់រុស្ស៊ី ក្នុងយុទ្ធនាការ World Cup ចាប់តាំងពីការបែកបាក់សហភាពសូវៀត ខណៈ ពួកគេមិនធ្លាប់ឆ្លងផុតវគ្គចែកពូលសោះ។ អារ៉ាប៊ីសាអ៊ូឌីត នឹងត្រូវបង្ហាញខ្លួនជាលើកទី ៥។ ការប្រកួតនេះនឹងចាប់ផ្តើមនៅម៉ោង ១០ យប់៕