លោកបានសរសេរនៅលើបណ្តាញសង្គម Twitter ថា៖ «តម្លៃប្រេងគឺខ្ពស់ពេក អង្គការ OPEC ជាអ្នកធ្វើឲ្យវាកើនឡើងខ្ពស់ម្តងទៀត។ មិនល្អទេ!»។
លោក ត្រាំ ថ្លែងទៅកាន់អ្នកសារព័ត៌មានមុនពេលចាកចេញពីអាមេរិកទៅចូលរួមកិច្ចប្រជុំរបស់ G7។
តម្លៃប្រេងបានកើនឡើងខ្ពស់បំផុតកាលពីចុងខែឧសភា ដោយឡើងដល់តម្លៃ ៨០ ដុល្លារក្នុងមួយបារ៉ែលនៅក្នុងកិច្ចសន្យាអនាគតសម្រាប់ប្រេងប្រភេទ Brent និង ៧២,២៤ ដុល្លារនៅក្នុងកិច្ចសន្យាអនាគតសម្រាប់ ប្រេងប្រភេទ West Texas Intermediate។ក្រុមពាណិជ្ជករកំពុងរង់ចាំមើលលទ្ធផលកិច្ចប្រជុំរបស់រដ្ឋមន្រ្តីក្រសួងប្រេងមកពីប្រទេសជាសមាជិករបស់អង្គការ OPEC ដែលនឹងរៀបចំធ្វើឡើងនៅថ្ងៃទី២២ ខែមិថុនា នៅទីក្រុងវីយែន ប្រទេសអូទ្រីស។
កាលពីខែមេសា រដ្ឋមន្រ្តីក្រសួងថាមពលរបស់ប្រទេសអារ៉ាប៊ីសាអូឌីត លោក Khaled al-Faleh បានថ្លែងថា ទីផ្សារសាកលមានសមត្ថភាពទទួលយកតម្លៃប្រេងកាន់តែខ្ពស់ ដែលសម្តីនេះបានធ្វើឲ្យមានប្រតិកម្ម ភ្លាមៗពីលោក ត្រាំ។
លោក ត្រាំ បានសរសេរនៅលើបណ្តាញសង្គម Twitter កាលពីថ្ងៃទី ២០ ខែមេសាថា៖ «ជាមួយនឹងបរិមាណប្រេងច្រើនបំផុតមិនធ្លាប់មានពីមុននៅគ្រប់ទីកន្លែង រួមទាំងកប៉ាល់ដែលផ្ទុកប្រេងពេញនៅសមុទ្រ តម្លៃប្រេងមានតម្លៃខ្ពស់ណាស់ជាលក្ខណៈសប្បនិម្មិត! មិនល្អ នឹងមិនអាចទទួលយកបាន!»។
អ្នកផលិតប្រេងដែលជាសមាជិក និងមិនមែនជាសមាជិករបស់អង្គការ OPEC បានចុះកិច្ចព្រមព្រៀងមួយកាលពីឆ្នាំ ២០១៦ ដើម្បីកាត់បន្ថយផលិតកម្មប្រេងចំនួន ១,៨ លានបារ៉ែលក្នុងមួយថ្ងៃដើម្បីកាត់បន្ថយការផ្គត់ផ្គង់ប្រេងសាកល។
កិច្ចព្រមព្រៀងដែលនឹងផុតសុពលភាពនៅចុងឆ្នាំ ២០១៨ នេះ បានទទួលជោគជ័យក្នុងការបង្កើនតម្លៃប្រេងខ្ពស់ជាង ៧០ ដុល្លារក្នុងមួយបារ៉ែលពីតម្លៃថោកជាង ៣០ ដុល្លារក្នុងមួយបារ៉ែលកាលពីដើមឆ្នាំ ២០១៦៕