Ramos និពន្ធ និង ច្រៀង​ចម្រៀង​ឲ្យ​អេស្ប៉ាញ​ ត្រៀម​យុទ្ធនាការ World Cup (មានវីដេអូ) ​​

ប្រធាន​ក្រុម Real Madrid កីឡាករ Sergio Ramos បាន​​និពន្ធ​ទំនុក​ច្រៀង និង ច្រៀង​បទ​ចម្រៀង​មួយ​សម្រាប់​យុទ្ធនាការ World Cup ២០១៨ របស់​អេស្ប៉ាញ ដែល​ខ្សែ​​ការពារ​រូប​នេះ​បាន​សហការ​ផលិត​ជាមួយ​អ្នក​ចំរៀង Demarco Flamenco។

អ្នក​ចំរៀង Demarco Flamenco និង Ramos និពន្ធ និង ច្រៀង​រួម​គ្នា

បទ​ចម្រៀង​មាន​ចំណង​ជើង​ជា​ភាសា​អេស្ប៉ាញ គឺ “Otra estrella en tu corazon” ឬ មាន​ន័យ​ជា​ភាសា​ខ្មែរ​ថា "តារា​មួយ​ទៀត​ក្នុង​ចិត្ត​អ្នក"។

ទំនុក​ច្រៀង​នោះ​រួម​មាន៖

Come on, Spain, (តោះ អេស្ប៉ាញ) raise your voice; (បន្លឺ​សំលេង​អ្នក​ឡើង) scream loudly, (ស្រែក​ឲ្យ​ខ្លាំង) shout that goal. (ហ៊ោ​នឹង​គ្រាប់​បាល់​)​ Thinking big we will achieve the best, (មាន​ក្តីប្រាថ្នា​ឲ្យ​ធំ យើង​នឹង​សម្រេច​​ដោយ​ថ្កុំថ្កើង)​ fighting together, towards the star with honour. (ស្រាក់​ដៃ​រួម​គ្នា ឆ្ពោះ​ទៅ​កាន់​​តារានិករ ដោយ​​មោទនភាព) We have to try. (យើង​ត្រូវ​ជម្នះ) May La Roja shine once more. (សូម​ឲ្យ La Roja ជួយ​ផ្ដល់​ពន្លឺ)

រឿង​មួយ​ដ៏​គួរ​ឲ្យ​ចាប់​អារម្មណ៍​អំពី​អេស្ប៉ាញ គឺ​ប្រសិន​បើ​លោក​អ្នក​​មើល​ការ​ប្រកួត​ World Cup ហើយ​កាមេរ៉ា​អូស​ទៅ​លើ​កីឡាករ​​នៅ​ពេល​គោរព​ទង់​ជាតិ នោះ​លោក​អ្នក​នឹង​ឃើញ​បបូរ​មាត់​ពួកគេ​មិន​កម្រើក​សូម្បី​បន្តិច ព្រោះ​ពួកគេ​គឺ​ជា​ជនជាតិ​អេស្ប៉ាញ។

ភ្លេង​ជាតិ​របស់​អេស្ប៉ាញ "Marcha Real ឬ ហៅ​តាម​ភាសា​អង់គ្លេស Royal March" មិន​មាន​ទំនុក​ច្រៀង​ទេ តាំង​ពី​ឆ្នាំ ១៩៧៨​ មក​ម្ល៉េះ។ ប៉ុន្តែ​កាល​ពី​មុន​ភ្លេង​ជាតិ​​អេស្ប៉ាញ​មាន​ពាក្យ​សម្រាប់​ច្រៀង​ប៉ុន្តែ​ពាក្យពេចន៍​ទាំង​នោះ​ត្រូវ​បាន​គិត​ថា​ជា "ហ្វាស៊ីស" ក្នុង​របប​ផ្តាច់ការ ម្ល៉ោះ​ហើយ​​សម័យ​ក្រោយ​មក​ ទើប​គេ​សម្រេច​​ថា​មិន​ឲ្យ​មាន​ទំនុក​ច្រៀង​តែ​ម្តង។

ដោយ​ឡែក អេស្ប៉ាញ​ធ្លាប់​លើក​ពាន World Cup របស់​ខ្លួន​តែ​ម្តង​គត់​កាល​ពី​ឆ្នាំ ២០១០ ហើយ​ក្រុម​ដែល​លើក​ពាន World Cup ច្រើន​ជាង​គេ​ គឺ​ប្រទេស​ប្រេស៊ីល បាន​ចំនួន​៥​ដង អាឡឺម៉ង់ និង អ៊ីតាលី ៤ដង​ដូច​គ្នា អាហ្សង់ទីន​ និង អ៊ុយរ៉ាហ្គាយ ម្នាក់​២​ដង ខណៈ​ដែល​បារាំង​ និង អង់គ្លេស បាន​ចំនួន​១​លើក​ដូច​គ្នា គិត​ចាប់​តាំង​ពី​ពាន​នេះ​ត្រូវ​បាន​បង្កើត​ឡើង តាំង​ពី​ឆ្នាំ ១៩៣០ តែ​ចន្លោះ​ពី​ឆ្នាំ ១៩៣៨-១៩៥០ World Cup ត្រូវ​អាក់ខាន​ដោយ​សារ​សង្គ្រាម​លោក៕




ប្រភព៖ Sports Keeda