ក្រុមប្រឹក្សាសហព័ន្ធ នៃសភារបស់រុស្សី នឹងអញ្ជើញលោក Mark Zuckerberg នាយកប្រតិបត្តិ Facebook មកចូលរួមក្នុងសម័យប្រជុំពេញអង្គមួយ។ នេះបើតាមការចុះផ្សាយរបស់សារព័ត៌មានរុស្សី TASS។
សមាជិកសភាមួយរូបឈ្មោះ Anton Belyakov ដែលជាអ្នកដាក់ពាក្យស្នើសុំការអញ្ជើញនេះបាននិយាយថា ៖ "ខ្ញុំមានភាពជឿជាក់ថាលោក (Mark) ជាមនុស្សម្នាក់មានគំនិតដើម្បីអាចចែករំលែក និង អាចមើលឃើញទៅថ្ងៃមុខ”។
លោក Anton Belyakov
គោលបំណងនៃការអញ្ជើញលោក Mark Zuckerberg នេះគឺចង់ពិភាក្សាថាតើបណ្ដាញសង្គមនេះបានជួយសម្រួលឲ្យរុស្សីជ្រៀតជ្រែកលើការបោះឆ្នោតនៅបរទេសដែរឬអត់ និងរឿងរ៉ាវមួយចំនួនទៀតដែលអាចជាប់ទាក់ទងនឹងការស្រាយបំភ្លឺរបស់ Mark នៅសភាអាមេរិក និងសភាអឺរ៉ុប។
ផ្អែកតាមការចុះផ្សាយរបស់ The Moscow Times សមាជិកសភាផ្សេងទៀតនិយាយថា Mark Zuckerberg មិនគួរត្រូវបានអញ្ជើញដោយសភានោះទេ ដោយសារលោកជាមនុស្សដែលមានគំនិតអវិជ្ជមានចំពោះរុស្សី។ Facebook មិនទាន់បានឆ្លើយតបនៅឡើយទេ ថា Mark ព្រមទទួលយកការអញ្ជើញពីរុស្សីឬយ៉ាងណានោះ ប៉ុន្តែគេជឿថាឱកាសដែលទទួលយកមានតិចតួចណាស់៕
ប្រភព៖
Quartz |
theregister
