ការលើកឡើងរបស់ លោក សុខ ឥសាន បានធ្វើឡើងបន្ទាប់ពីតំណាងរាស្ត្រសហរដ្ឋអាមេរិកពីខាងគណបក្សប្រជាធិបតេយ្យ លោក អាឡាន់ ឡូវែនថល (Alan Lowenthal) និងលោក ថិត យូហូ (Ted Yoho) តំណាងរាស្ត្រមកពីគណបក្សសាធារណរដ្ឋ ចង់បង្កើតច្បាប់ដើម្បីដាក់សម្ពាធលើរាជរដ្ឋាភិបាលកម្ពុជា។
លោកបានលើកឡើងយ៉ាងដូច្នេះថា៖ «នេះការអនុម័តច្បាប់ ដែលចង់ដាក់បន្ទុកមកលេីរាជរដ្ឋាភិបាលកម្ពុជា និងប្រជាជនកម្ពុជា នឹងមិនអាចចេញជាលទ្ធផលឡេីយ។ ពួកមេក្លោង និងពួកអាយ៉ងដែលធ្វេីបដិវត្តន៍ពណ៌ ហេីយត្រូវបរាជ័យនៅកម្ពុជាទេ ដែលជាអ្នកចង់បំផ្លាញលទ្ធិប្រជាធិបតេយ្យនៅកម្ពុជានោះ ហេីយអាយ៉ងដែលជាអ្នកអនុវត្តផែនការនេះ ត្រូវតែទទួលខុសត្រូវចំពោះមុខច្បាប់កម្ពុជា»។
ទោះជាយ៉ាងនេះក្តី ជំហររបស់លោក អាឡាន់ ឡូវែនថល (Alan Lowenthal) និងលោក ថិត យូហូ (Ted Yoho) គឺផ្ទុយនឹងជំហររបស់សមាជិកព្រឹទ្ធសភាអាមេរិកផ្សេងៗ ដែលមិនចង់ឱ្យអាមេរិកជ្រៀតជ្រែកកិច្ចការផ្ទៃក្នុងរបស់កម្ពុជា។
លោកបានបន្តថា ពិភពលោកទាំងមូល ពោលគ្មាន ប្រទេសណាមួយនៅលើលោក អាចមកបញ្ជាឲ្យកម្ពុជាដែលជារដ្ឋអធិបតេយ្យ ធ្វើអ្វីតាមការបញ្ជារបស់ពួកគេបានឡើយ ផ្ទុយទៅវិញកម្ពុជាជាអ្នកកំណត់ផ្លូវដើរដោយខ្លួនឯង សម្រាប់ជោគវាសនារបស់ប្រជាជាតិ និងប្រជាពលរដ្ឋទាំងមូល។ លោកបានបន្ថែមថា ប្រជាជនកម្ពុជាគឺជាមិត្តរបស់សហរដ្ឋអាមេរិក មិនមែនជាសត្រូវនោះទេ ពិសេសជាងនោះទៀតគឺគណបក្សប្រជាជនកម្ពុជា គឺមិត្តរបស់អាមេរិក៕
