ប៉ូលិសនិយាយថា រថយន្តបង្កម៉ាក Lexus RX300 ពណ៌ខ្មៅស្លាកលេខភ្នំពេញ 2L-3636 បើកបរដោយឈ្មោះ ហ៊ុន សុខុន ភេទប្រុស អាយុ៤១ឆ្នាំ មុខរបរ លក់ដូរ ស្នាក់នៅផ្ទះលេខ២២បេអឺ០ ផ្លូវលេខ៥៦៦ សង្កាត់បឹងកក់២ ខណ្ឌទួលគោក ត្រូវបានប៉ូលិសវ៉ៃខ្នោះ។
ប៉ូលិសបន្តថា ដំបូងរថយន្តនេះបើកតាមផ្លូវជាតិលេខ១ ពីកើតទៅលិច ដល់ចំណុចមុខផ្ទះលេខ៦១០ ក៏បុកម៉ូតូម៉ាកស្មាស់ពណ៌ក្រហម ស្លាកលេខភ្នំពេញ 1BQ-0714 បើកបរដោយឈ្មោះ សុខ លីសាន ភេទស្រី អាយុ១៤ឆ្នាំ មុខរបរសិស្សនិងអ្នករួមដំណើរឈ្មោះ ឆេង ស្រីពេជ្រ មុខរបរសិស្ស ស្នាក់នៅភូមិតាង៉ូវ សង្កាត់និរោធ ខណ្ឌច្បារអំពៅ ដូចគ្នារងរបួសស្រាល។
បន្ទាប់មករថយន្តបង្កបានបន្តបើកមកដល់មុខផ្ទះលេខ៦០០ ផ្លូវជាតិលេខ១ ដដែលក៏បុកម៉ូតូមួយគ្រឿងទៀតម៉ាកស្កូពី ពណ៌ស ស្លាកលេខភ្នំពេញ 1S-5790 បើកបរដោយឈ្មោះ ឌី ហុង ភេទប្រុស អាយុ៥៧ឆ្នាំ ស្នាក់នៅសង្កាត់ព្រែកប្រា ខណ្ឌច្បារអំពៅ របួសស្រាល។
លុះបើករត់មកដល់មុខផ្ទះលេខ១៩អឺ០ ផ្លូវជាតិលេខ១ ក៏បុករថយន្តម៉ាក Ford ពណ៌ទឹកប្រាក់ពីក្រោយ ស្លាកលេខរដ្ឋ ១៣-២-០៥៧៤ បើកបរដោយឈ្មោះ សុខ ចំណាប់ ភេទប្រុស អាយុ៤៥ឆ្នាំ មុខរបរមន្ត្រីអគ្គិសនី បណ្តាលឱ្យខូចស្រាល។
ក្រោយមកបានបើករត់ឆ្លងស្ពានព្រះមុនីវង្សចាស់ចូលផ្លូវ ៦០ម៉ែត្របើកបុករថយន្តប៉ូលិស ម៉ាកម៉ាស្តារ ពណ៌ស ស្លាកលេខ ន-ប2-2093 បើកបរដោយឈ្មោះ ប៊ន សំអុល ភេទប្រុស អាយុ៤០ឆ្នាំ មន្ត្រីប៉ូលិសក្រសួងមហាផ្ទៃ ស្នាក់នៅសង្កាត់ភ្នំពេញថ្មី ខណ្ឌសែនសុខ ខូចរថយន្តមួយចំហៀង។
ជាបន្តបានបើកបុកម៉ូតូម៉ាកស្មាស់ពណ៌ស ស្លាកលេខកណ្តាល 1S-1467 បើកបុកដោយឈ្មោះ សួន ណារ៉ូ ភេទប្រុស អាយុ២៥ឆ្នាំ មុខរបរកម្មករសំណង់ ស្នាក់នៅក្រុងតាខ្មៅ ខេត្តកណ្តាល របួសធ្ងន់បាក់ជើង ដេកពេទ្យរុស្ស៊ី។ ទើបឈប់ទៅមុខលែងរួច ហើយអ្នកបើកបរត្រូវបានប៉ូលិសវ៉ៃខ្នោះ។
ប៉ូលិសបន្តទៀតថា សរុបទាំងអស់បុរសនេះបើកបុករថយន្តខូច២គ្រឿង បុកម៉ូតូ៣គ្រឿង របួសធ្ងន់ស្រាល៤នាក់។ បច្ចុប្បន្នយានយន្តទាំងអស់ត្រូវបានសមត្ថកិច្ចនាំយកទៅការិយាល័យចរាចរណ៍ផ្លូវគោករាជធានីភ្នំពេញដោះស្រាយតាមច្បាប់។
