Galaxy S9/S9+ និង iPhone X គឺជាជើងខ្លាំងនាពេលបច្ចុប្បន្នដែលតំណាងឲ្យ Android និង iOS។ ការប្រកួតប្រជែងរវាងស្មាតហ្វូនទាំងពីរ មានមនុស្សជាច្រើនអន្ទះសាចង់ឃើញ។ វីដេអូខាងក្រោមនេះមានបង្ហាញពីការប្រកួតសមត្ថភាព S9+ និង iPhone X ដែលលទ្ធផលគឺភ្ញាក់ផ្អើលបំផុត។
និយាយពីលក្ខណៈសម្បត្តិ Galaxy S9+ ដំណើរការដោយបន្ទះឈីប Exynos 9810 និង RAM ទំហំ ៦ GB។ ចំណែក iPhone X ប្រើបន្ទះឈីប A11 Bionic និងមាន RAM ទំហំ ៣ GB។
ចំណុចដែលធ្វើឲ្យភ្ញាក់ផ្អើល គឺនៅពេលបើកហ្គេម Galaxy S9+ បានយកឈ្នះ iPhone X មិនចេះតិចដង ដែលជាធម្មតាកម្រមានស្មាតហ្វូន Android ណាអាចបើកហ្គេមបានលឿនជាង iPhone X ណាស់។ មិនតែប៉ុណ្ណោះការបើកកម្មវិធីតូចៗមួយចំនួនក៏ Galaxy S9+ អាចយកឈ្នះ iPhone X បានផងដែរ ប៉ុន្តែនាំមុខតែបន្តិចបន្តួចប៉ុណ្ណោះ។
ចំណែកឯសមត្ថភាពរក្សាទុកកម្មវិធីក្នុង RAM វិញ Galaxy S9+ អាចធ្វើបានល្អជាង iPhone X ឆ្ងាយ ដោយ iPhone X ត្រូវដំណើរការសាឡើងវិញនៅត្រឹមកម្មវិធីទីបី ដែលជាហ្គេម Asphalt។ ត្បិតថាត្រូវដំណើរការកម្មវិធីទីបីសាឡើងវិញ ប៉ុន្តែ iPhone X ក៏អាចរក្សាទុកកម្មវិធីតូចៗមួយចំនួនឲ្យនៅដំណើរការក្នុង RAM បានផងដែរ៕
ប្រភព៖
Thegioididong ប្រែសម្រួល៖ ឡៃហ៊ាង