ខេត្តព្រះសីហនុ៖ នៅវេលាល្ងាចម៉ោង១៧:៣០នាទី ថ្ងៃទី២៦ ខែកុម្ភៈ ឆ្នាំ ២០១៨ ថ្មីៗនេះ មានទូកដឹកភ្ញៀវទេសចរណ៏មួយគ្រឿង បានលិចនៅកំពង់ផែភូមិសុខសាន្ត សង្កាត់កោះរ៉ុង បណ្តាលឲ្យស្លាប់ស្ត្រីម្នាក់ ឈ្មោះ ហែម ឡំ អាយុ៣៨ឆ្នាំ មុខរបរមិនពិតប្រាកដ។ មុនពេលកើតហេតុ ជនរងគ្រោះទើបត្រឡប់មកពីស្រុកកំណើត នៅភូមិទូកមាស ឃុំទូកមាសខាងលិច ស្រុកបន្ទាយមាស ខេត្តកំពត។
ទូកដឹកភ្ញៀវទេសចរណ៍នោះ បានធ្វើដំណើរពីខេត្តព្រះសីហនុ ចូលចតនៅកំពង់ផែយាយសក់ក្រហម ភូមិសុខសាន្ត សង្កាត់កោះរ៉ុង ក្រុងព្រះសីហនុ។ ដោយសារតែមានខ្យល់ខ្លាំង រលកធំៗ បោកបក់ ទើបបណ្ដាលឲ្យលិចទូកនៅក្នុងកំពង់ ធ្លាក់ជនរងគ្រោះចូលក្នុងទឹក ទម្រាំរាវរកឃើញ ជនរងគ្រោះបានលង់ទឹកស្លាប់បាត់ទៅហើយ។