ភ្នំពេញ ៖ នៅទីបំផុត សាលាឧទ្ធរណ៍ នៅតែសម្រេចបន្តឃុំខ្លួន លោក កឹម សុខា ប្រធានអតីតគណបក្សប្រឆាំងដដែល បើទោះជាមានការនាំខ្លួន លោក កឹម សុខា មកចូលរួមសវនាការ ជាអសាធារណៈនៅព្រឹកថ្ងៃនេះក៏ដោយ។ មេធាវីការពារក្តី បានហៅការសម្រេចរបស់តុលាការជាន់ខ្ពស់មួយនេះ ថាដូចជាការចាក់ពុម្ពតាមតុលាការជាន់ទាបនោះដែរ។
ម្តាយរបស់ លោក កឹម សុខា និងភរិយា បានយំក្តុលត្តួលនិងលើកដៃសំពះ មុនពេលត្រូវបានអនុញ្ញាតឲ្យចូលបរិវេណសាលាឧទ្ធរណ៍ ដើម្បីផ្តល់អាហារ ខណៈពេលបើកសវនាការ ជាអសាធារណៈ ទៅលើបណ្តឹងសុំនៅក្រៅឃុំបណ្តោះអាសន្ន របស់ប្រធាននៃអតីតគណបក្សសង្គ្រោះជាតិ។
បើតាមក្រុមគ្រួសារ លោក កឹម សុខា ត្រូវបានសមត្ថកិច្ចដឹកពីពន្ធនាគារត្រពាំងផ្លុងជាប់ព្រំដែនវៀតណាម មកដល់សាលាឧទ្ធរណ៍តាំងពីម៉ោង៥៖៤០នាទី ព្រលឹមថ្ងៃទី០១ ថ្ងៃកុម្ភៈនេះ។
នៅជុំវិញបរិវេណសាលាឧទ្ធរណ៍ ត្រូវបានសមត្ថកិច្ចរិតបន្តឹងសន្តិសុខយ៉ាងតឹងរឹងដោយមានបិទកំណាត់ផ្លូវមួយចំនួនផង ខណៈគេសង្កេតឃើញអតីតតំណាងរាស្ត្រ គណបក្សសង្រ្គោះជាតិមួយចំនួនបានទៅតាមដាននៅខាងក្រៅរបងតុលាការ។
សូមបញ្ជាក់ថា នេះជាលើកទី១ហើយ ដែលតុលាការបាននាំខ្លួន លោក កឹម សុខា ចេញពីពន្ធនាគារមកបើកសវនាការ ចាប់តាំងពីមានការចាប់ខ្លួននៅពាក់កណ្តាលអាទ្រាធ នៅផ្ទះរបស់លោក នាយប់ថ្ងៃ៣ខែកញ្ញា កាលពី៥ខែមុន។ សវនាការជាអសាធារណៈនៅសាលាឧទ្ធរណ៍នេះធ្វើឡើងទៅលើបណ្តឹងសុំនៅក្រៅឃុំបណ្តោះអាសន្ន ប្រឆាំងនឹងការឃុំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ។
ក៏ប៉ុន្តែមិនមានអ្វីខុសប្លែកពីតុលាការជាន់ទាបនោះទេ គឺសាលាឧទ្ធរណ៍ នៅតែសម្រេចបន្តឃុំខ្លួន លោក កឹម សុខា ដដែល បន្ទាប់ពីសាកសួរជាច្រើនម៉ោង។ មេធាវីម្នាក់ការពារក្តីឲ្យ លោក កឹម សុខា គឺលោក ហែម សុជាតិ បានហៅការសម្រេចរបស់តុលាការជាន់ខ្ពស់មួយនេះ ថាដូចជាការចាក់ពុម្ពតាមតុលាការជាន់ទាបនោះដែរ។ តែលោកបានប្រាប់បន្ថែមថា នឹងបន្តតតាំងក្តីទៅតុលាការកំពូលទៀត បើទោះជាបីមិនសូវសង្ឈឹមថា កូនក្តីបាននៅក្រៅឃុំក៏ដោយ។
បើតាម លោក ហែម សុជាតិ នៅក្នុងសវនាការ លោក កឹម សុខា ដែលមានបញ្ហាសុខភាពច្រើនមុខដូចជា ទឹកនោមផ្អែម លើសឈាម និងជាប់សរសៃផងនោះ មិនបាននិយាយច្រើនទេ ព្រោះជាសវនាការសុំនៅក្រៅឃុំ ប៉ុន្តែលោកថា លោក កឹម សុខា បានឆ្លៀតបដិសេធនឹងការចោទថា «ក្បត់ជាតិ» នោះ។
លោក កឹម សុខា ត្រូវបានចោទប្រកាន់ថា «ក្បត់ជាតិ» បន្ទាប់ពីលោកបានថ្លែងនៅឯក្រៅប្រទេសកាលពីអំឡុងជាង៥ឆ្នាំមុន ថាលោកទទួលបានការបណ្តុះបណ្តាលពីអាមេរិក ដែលរដ្ឋាភិបាលកម្ពុជាចោទថា ក្នុងគោលបំណងផ្តួលរំលំរាជរដ្ឋាភិបាលខ្មែរ។
ប៉ុន្តែ លោក កឹម សុខា តាមរយៈក្រុមមេធាវី ការពារក្តី បានអះអាងថា វីដេអូនោះ ត្រូវបានគេកាត់ជាកង់ៗ ដែលមានន័យខុសពីខ្លឹមសារដើម។