ស្លាប់ម្នាក់ និងរងរបួសធ្ងន់ម្នាក់ក្នុងហេតុការណ៍គ្រោះថ្នាក់ចរាចរពីរផ្សេងគ្នា
29/01/2018
ខេត្តស្ទឹងត្រែង ៖ គ្រោះចរាចរនៅតែជាដើមចមបង្កគ្រោះថ្នាក់ បណ្ដាលឲ្យមនុស្សស្លាប់ និងរបួសរាល់ថ្ងៃ កត្តាទាំងនេះមន្ត្រីនគរបាលចរាចរណ៍អះអាងថា បានកើតចេញពីកត្តាមួយចំនួនដូចជា អ្នកបើកបរមិនគោរពច្បាប់ចរាចរណ៍ ខ្វះការប្រុងប្រយ័ត្ន និងរំលោភលើល្បឿន ។ ជាក់ស្តែងមនុស្សប្រុសស្រីចំនួនពីរនាក់ បានរងគ្រោះក្នុងហេតុការណ៍គ្រោះថ្នាក់ចរាចរពីរកន្លែងផ្សេងគ្នា ដោយបុរសម្នាក់ស្លាប់ និងស្ត្រីម្នាក់ទៀតរងរបួសធ្ងន់ធ្ងរ ។
មន្ត្រីនគរបាលឲ្យដឹងថា នៅវេលាម៉ោង០៧និង៣៥នាទីព្រឹក ថ្ងៃទី២៨ ខែមករា ឆ្នាំ២០១៨ ជនរងគ្រោះឈ្មោះ អ៊ុំ ភារិន្ទ ភេទស្រី អាយុ២៨ឆ្នាំ រស់នៅភូមិកំពង់ប៉ាង ឃុំកាំងចាម ស្រុកថាឡាបរិវ៉ាត់ បានរងរបួសត្រង់សៀតផ្កាខាងឆ្វេង បណ្ដាលឲ្យរងរបួសធ្ងន់ធ្ងរ គ្រាបើកបរគោយន្តគេចម៉ូតូទៅធ្លាក់ប្រឡាយបោកក្បាលទៅនិងខឿនថ្មក្បែរសាលារៀនបាចុង ស្ថិតនៅភូមិបាចុង សង្កាត់ព្រះបាទ ក្រុងស្ទឹងត្រែង ខេត្តស្ទឹងត្រែង ។
ក្រោយកើតហេតុ ជនរងគ្រោះត្រូវបានគេនាំទៅសង្គ្រោះបន្ទាន់នៅមន្ទីរពេទ្យបង្អែកខេត្ត ហើយមានការអះអាងពីគ្រូពេទ្យថា សភាពជនរងគ្រោះមានសង្ឃឹមតិចតួចបំផុត ។
មន្ត្រីនគរបាលដដែលបន្តថា នៅវេលាម៉ោង២២និង១០នាទីយប់ ថ្ងៃទី២៨ ខែមករា ដដែល ហេតុការណ៍គ្រោះថ្នាក់ចរាចរមួយលើកទៀតបានកើតឡើងនៅលើកំណាត់ផ្លូវជាតិលេខ៧៨ ភូមិកាតូត ឃុំកំភុន ស្រុកសេសាន ខេត្តស្ទឹងត្រែង ដែលបង្កឲ្យបុរសម្នាក់ឈ្មោះ ដាំ វុទ្ធថូ អាយុ៣២ឆ្នាំ រស់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ស្លាប់គ្រាបើកបរម៉ូតូពីកើតមកលិចបុកគោយន្តដឹកឈើពីក្រោយ ។ ក្រោយកើតហេតុ ក្រុមគ្រួសារទៅទទួលសាកសពពីមន្ត្រីនគរបាល និងមេភូមិ យកមកធ្វើបុណ្យតាមប្រពៃណីនៅភូមិកំណើតខាងលើ ។
ទាក់ទិនករណីគ្រោះថ្នាក់ចរាចរនៅឆ្នាំ២០១៧កន្លងទៅនេះ បានកើតឡើងចំនួន១០០ករណី បង្កឲ្យមនុស្សប្រុសស្រីចំនួន៤០នាក់ស្លាប់ របួសធ្ងន់ចំនួន៩៥នាក់ និងរបួសស្រាលចំនួន៧៥នាក់ ដែលកត្តានេះបង្កឡើងដោយអ្នកបើកបរខ្វះការប្រុងប្រយ័ត្ន និងរំលោភលើល្បឿន ។ ករណីស្លាប់ និងរបួសខាងលើនេះ អ្នកបើកបរភាគច្រើនមិនបានពាក់មួកការពារសុវត្ថិភាព និងពុំបានដាក់កញ្ចក់មើលក្រោយ ដែលជាហេតុបង្កឲ្យមានបញ្ហាគ្រោះផ្សេងៗកើតឡើងយ៉ាងដូច្នេះ ។
