នាំទៅពេទ្យបាន១ថ្ងៃ ស្រាប់តែប្រទះឃើញអណ្តែតទឹក
25/01/2018
ខេត្តកំពង់ធំ ៖ ករណីប្រទះឃើញសពបុរសម្នាក់អណ្ដែតទឹក ត្រូវបានពលរដ្ឋប្រទះឃើញ កាលពីព្រឹកថ្ងៃទី២៥ ខែមករា ឆ្នាំ២០១៨ នៅតំបន់អាងស្ទុកទឹកមួយកន្លែង ក្នុងភូមិសង្រោះ ឃុំបឹងល្វា ស្រុកសន្ទុក ខេត្តកំពង់ធំ ។
បើតោងតាមប្រភពព័ត៌មានពីសាច់ញាតិជនរងគ្រោះបានឲ្យដឹងថា ជនរងគ្រោះឈ្មោះ ហង់ ហ៊ុន ភេទប្រុស អាយុ៤៦ឆ្នាំ មុខរបរកសិករ នៅភូមិហាន់ទ្វា ឃុំជ្រលង ស្រុកបារាយណ៍ ខេត្តកំពង់ធំ ។
ជនរងគ្រោះជាមនុស្សញៀនស្រារហូតធ្លាក់ខ្លួនឈឺ មានសតិមិនគ្រប់ ហេតុដូច្នេះហើយទើបនៅថ្ងៃ១៩ ខែមករា ឆ្នាំ២០១៨ ត្រូវបានប្រពន្ធ និងកូនបាននាំយកមកសម្រាកព្យាបាលនៅមន្ទីរពេទ្យបង្អែកត្រពាំងស្វាយ បានតែ១ថ្ងៃ ដល់ល្ងាចថ្ងៃទី២០ ខែមករា ស្រាប់តែជនរងគ្រោះបានរត់ចេញពីមន្ទីរពេទ្យបាត់ ដោយគ្មានដំណឹងអ្វីសោះ លុះដល់ព្រឹកថ្ងៃទី២៥ ខែមករា ខាងលើ ក៏មានប្រជាពលរដ្ឋបានទៅដាក់មងនៅតំបន់កើតហេតុ ក៏ប្រទះឃើញសាកសពអណ្ដែតទឹក ក៏បានរាយការណ៍ឲ្យមេភូមិ ហើយមេភូមិបានរាយការណ៍ដល់សមត្ថកិច្ច ក៏បានបង្កើតគណៈកម្មការពិនិត្យសាកសព និងកន្លែងកើតហេតុ ។
ការពិនិត្យនោះពុំឃើញមានស្លាកស្នាម ឬវត្ថុអ្វីពាក់ព័ន្ធនឹងបទល្មើសនោះទេ ទើបធ្វើការសន្និដ្ឋានបានថា សាកសពពិតជាបានលង់ទឹកស្លាប់ដោយខ្លួនឯង ហើយប្រគល់ឲ្យសាច់ញាតិយកទៅធ្វើបុណ្យតាមប្រពៃណី ។
