ខេត្តកំពង់ចាម ៖ បើទោះជាច្បាប់ចរារចណ៍ត្រូវបានរឹតបន្តឹងយ៉ាងណាក្តី ក៏នៅតាមផ្លូវបានកើតមានជាបន្តបន្ទាប់ ជាក់ស្តែងនៅរសៀលថ្ងៃទី០៦ ខែមករា ឆ្នាំ២០១៨ ក្នុងសង្កាត់កំពង់ចាម និងសង្កាត់សំបួរមាស ក្រុងកំពង់ចាម ។ មានគ្រោះថ្នាក់ចរាចរណ៍បានកើតឡើងចំនួន២លើក បណ្តាលឲ្យស្លាប់ម្នាក់និងរបួសធ្ងន់ធ្ងន់ស្រាល៣នាក់ ។
លោកវរសេនីយ៍ត្រីស៊ាម យូសេង អធិការរងនគរបាលក្រុងកំពង់ចាមប្រាប់ឲ្យដឹងថា ហេតុការណ៍
គ្រោះថ្នាក់ចរាចរណ៍ទី១ បានកើតឡើងនៅវេលាម៉ោង១រសៀល រវាងកង់ និងរថយន្តស្លាកលេខភ្នំពេញ២J-៧៦៣៦ អ្នកបើកមិនស្គាល់អត្តសញ្ញាណក្នុងភូមិទី៧ សង្កាត់កំពង់ចាម ក្រុងកំពង់ចាម ភ្លាមៗនោះបណ្តាលឲ្យក្មេងប្រុសឈ្មោះឡុង ដាលីនភូមិរិន អាយុ១៣ឆ្នាំ រស់នៅភូមិសង្កាត់កើតហេតុតែម្តង ។
លោកប្រាប់បន្តថា មុនកើតហេតុកង់របស់សិស្សបានជិះពីត្បូងចេញមកជើង ជាប់ក្រោយរបងសាលាដំបូងខេត្ត លុះពេលដែលជិះឆ្លងផ្លូវមិនទាន់នឹងផុតផង ស្រាប់តែមានរថយន្ត១គ្រឿងដែលបើកបរក្នុងទិសដៅពីកើតមកលិចបានបុកដោយអូសកង់ជាច្រើនម៉ែត្របណ្តាលឲ្យក្មេងដែលជិះកង់របួសធ្ងន់ ត្រូវបញ្ជូនមកសង្គ្រោះនៅមន្ទីរពេទ្យខេត្ត ។ ហើយត្រូវបានសាច់ញាតិបញ្ជូនបន្តទៅសង្គ្រោះនៅប្រទេសវៀតណាម តែគ្រោះអកុសលរហូតដល់ពេលយប់ក្មេងប្រុសនោះបានស្លាប់ ហើយមកដល់ព្រឹកថ្ងៃទី០៧ ខែមករា ត្រូវបានឪពុកម្តាយរៀបចំធ្វើបុណ្យតាមប្រពៃណី ។
ចំណែករថយន្ត និងកង់ត្រូវបាននាំមករក្សាទុកនៅអធិការដ្ឋាននគរបាលក្រុងកំពង់ចាម ដើម្បីធ្វើការស្រាវជ្រាវរកម្ចាស់រថយន្តដែលរត់គេចខ្លួននោះ ។
ដោយឡែកគ្រោះថ្នាក់ចរាចរណ៍ទី២វិញ បានកើតឡើងនៅវេលាម៉ោង១និង២០នាទីរសៀលថ្ងៃទី០៦
ខែមករា ឆ្នាំ២០១៨ ត្រង់ចំណុចខាងត្បូងស្ពានព្រែកដើមចាន់ក្នុងភូមិដើមចាន់ សង្កាត់សំបួរមាស ក្រុងកំពង់ចាម មានគ្រោះថ្នាក់ចរាចរណ៍បានកើតឡើង១ករណីទៀត រវាងម៉ូតូម៉ាកC 125 និងម៉ូតូម៉ាកឡែតបណ្តាលឲ្យរងរបួសមនុស្សចំនួន០៣នាក់ ក្នុងនោះប្រុស២នាក់ និងស្រីម្នាក់ វត្ថុតាងត្រូវបាននាំមករក្សាទុកនៅអធិការដ្ឋាននគរបាលក្រុងកំពង់ចាម ដើម្បីដោះស្រាយតាមច្បាប់ ៕