ខេត្តតាកែវ ៖ កម្លាំងអធិការនគរបាលស្រុកព្រៃកប្បាស បានធ្វើការឃាត់ខ្លួនជនសង្ស័យ០១ម្នាក់ពាក់ព័ន្ធរំលោភសេពសន្ថវៈនៅព្រឹកថ្ងៃទី០៧ ខែមករា ឆ្នាំ២០១៨ នៅចំណុចភូមិស្រែពោធិ៍ ឃុំចារ ស្រុកព្រៃកប្បាស ខេត្តតាកែវ ។
នគរបាលស្រុកព្រៃកប្បាសបានឱ្យដឹងថា នៅវេលាម៉ោង២៣និង៥០នាទីយប់ថ្ងៃទី០៦ ខែមករា ឆ្នាំ២០១៨ ជនសង្ស័យឈ្មោះសុង ពិសិដ្ឋ ភេទប្រុស អាយុ២៥ឆ្នាំ រស់នៅភូមិ-ឃុំកើតហេតុ បានធ្វើសកម្មភាពចូលទៅផ្ទះជនរងគ្រោះ ហើយចាប់ច្របាច់.ក ជនរងគ្រោះដល់សន្លប់ រួចរំលោភរហូតបានសម្រេច ។ ជនរងគ្រោះមានអាយុ៣១ឆ្នាំ (ជាស្ត្រីមេម៉ាយ) ខណៈពេលស្ត្រី រងគ្រោះកំពុងដេកនៅក្នុងផ្ទះរបស់ខ្លួន ។
ក្រោយពេលធ្វើសកម្មភាពរួច ជនសង្ស័យខាងលើបានរត់គេចខ្លួន លុះដល់ស្ត្រីរងគ្រោះដឹងខ្លួនឡើងក៏បានរាយការណ៍មកសមត្ថកិច្ចនឹងឈានដល់ធ្វើការឃាត់ខ្លួនជនសង្ស័យបាននៅចំណុចផ្ទះរបស់ជនសង្ស័យតែម្តង ។
នៅចំពោះមុខប៉ូលិសជនសង្ស័យបាននិយាយសារភាពថា រូបគេពិតជាបានធ្វើសកម្មភាពចូលទៅក្នុងផ្ទះស្ត្រីរងគ្រោះពិតមែន រួចច្របាច់.កឲ្យសន្លប់ បន្ទាប់មករំលោភរហូតបានសម្រេច ។ នៅពេលនេះប៉ូលិសការិយាល័យប្រឆាំងការជួញដូរមនុស្ស និងការពារអនីតិជនខេត្តកំពុងកសាងសំណុំរឿង ដើម្បីបញ្ជូនជនសង្ស័យទៅសាលាដំបូងខេត្តនៅថ្ងែទី០៨ ខែមករា ឆ្នាំ ២០១៨ នេះចាត់ការទៅតាមច្បាប់ ៕
