ថ្លែងប្រាប់ក្រុមអ្នកសារព័ត៌មានក្រោយកិច្ចប្រជុំគណៈអចិន្ត្រៃយ៍រដ្ឋសភានៅថ្ងៃទី៣ ខែមករា នេះ ឯកឧត្ដម ឈាង វុន ប្រធានគណៈកម្មការ កិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា បានអោយដឹងថា កន្លងមកមានជនអគតិមួយចំនួនបានជេរប្រមាថ និងប្រើប្រាស់ពាក្យសំដីមិនសមរម្យដល់ព្រះមហាក្សត្រ ដូចនេះក្នុងនាមមន្ត្រីរាជការត្រូវតែការពារកិត្តិយសព្រះមហាក្សត្រដោយរាជរដ្ឋាភិបាលមានគំនិតធ្វើវិសោធនកម្មរដ្ឋធម្មនុញ្ញដើម្បីដាក់ទោសទណ្ឌដល់ជនណាដែលប្រមាថ ឬបង្ខូចព្រះកិត្តិនាមរបស់ព្រះមហាក្សត្រ។
តែទោះជាយ៉ាងណាឯកឧត្តមញ្ជាក់ទៀតថា មកដល់ពេលនេះ រដ្ឋសភាពមិនទាន់បានទទួលសំណើរសុំធ្វើវិសោធនកម្មច្បាប់រដ្ឋធម្មនុញ្ញនៅឡើយទេ ដោយក្រុមការងាររបស់រាជរដ្ឋាភិបាលកំពុងត្រួតពិនិត្យ និងធ្វើការលើបញ្ហានេះ ជាមួយគ្នានេះផងដែរ រដ្ឋសភាស្វាគមន៍ចំពោះរាជរដ្ឋាភិបាលក្នុងការលើកយកបញ្ហាទាំងនេះមកសិក្សា។
រាជរដ្ឋាភិបាលកន្លងមកនេះ បានបង្កើតក្រុមការងារសិក្សា រដ្ឋធម្មនុញ្ញដើម្បីស្វែងរកលទ្ធភាពធ្វើវិសោធនកម្ម ដើម្បីកែចំណុចចំនួន៣នៅក្នុងរដ្ឋធម្មនុញ្ញ ។
ដោយចំណុច ទាំងបីដែលរដ្ឋាភិបាលកម្ពុជាចង់ឲ្យធ្វើវិសោធន៍រួមមាន៖ ទី១ គឺទាក់ទង នឹងសមាសភាពរដ្ឋាភិបាល ដោយកាត់បន្ថយរដ្ឋលេខាធិការក្រោមអំណាច ដោយមិនចាំបាច់ឆ្លងកាត់រដ្ឋសភាមុន។ ចំណុចទី២ គឺការយកកម្ពុជាទៅបៀបប្រដូចទៅនឹងប្រទេសមួយចំនួនដែលកំពុង ហែកហួរដោយសង្គ្រាម។ និងចំណុចទី៣ វិញ ឲ្យមានចែងនៅក្នុងរដ្ឋធម្មនុញ្ញដោយមិនត្រូវឲ្យមានបុគ្គលណាធ្វើ ឲ្យប៉ះពាល់ដល់ផលប្រយោជន៍ជាតិកម្ពុជា និងព្រះមហាក្សត្រ ទាំងក្នុងប្រទេស និងក្រៅប្រទេស៕ ប្រភព៖ BayonTV
