ក្រសួងការពារជាតិបានត្រឹមជើងឯករងប៉ុណ្ណោះក្នុងការប្រកួតលីគកំពូលកម្ពុជា ដោយចាញ់ក្រុមបឹងកេតដោយបាល់កាត់សេចក្ដី១១ម៉ែត្រ។ ក្រុមដែលដឹកនាំដោយលោក ទេព ឡុងរចនា នេះពិតជាធ្វើបានល្អតាំងពីវគ្គ Play-Off មក ដោយទម្លាក់ក្រុមខ្លាំងណាហ្គាវើល និងព្រះខ័នរាជស្វាយរៀងជាដើម មុនមកចាញ់ក្រុមបឹងកេតនេះ។
ក្រោយពីបរាជ័យនៅវគ្គផ្ដាច់ព្រ័ត្រនិងបានត្រឹមជើងឯករង២ឆ្នាំជាប់គ្នានេះ លោក ទេព ឡុងរចនា បានបង្ហាញគម្រោងផ្លាស់ប្ដូរកីឡាករបរទេសចេញខ្លះ ដើម្បីរៀបទម្រង់លេងជាថ្មី និងដាក់គោលដៅសម្រាប់រដូវកាលថ្មីខាងមុខនេះ។ យ៉ាងណាមិញ ការផ្លាស់ប្ដូរនោះ មិនទាន់ដឹងថាត្រូវជម្រុះកីឡាករកូរ៉េខាងជើងទាំង៤នាក់ចេញតែម្ដង ឬយ៉ាងណានោះទេ។ ដោយត្រូវពិភាក្សាជាមួយថ្នាក់ដឹកនាំ បន្ដទៀតរឿងផ្លាស់ប្ដូរកីឡាករនេះ។
សម្រាប់គោលការណ៍កីឡាករបរទេសនៅកម្ពុជា គឺតម្រូវឱ្យមាន៥នាក់ (មានកីឡាករអាស៊ីម្នាក់) ហើយអាចដាក់ឱ្យចូលលេងក្នុងទីលានបាន៤នាក់ពេលប្រកួត។ ដោយឡែកសម្រាប់រដូវកាលមុននេះ ក្រុមក្រសួងការពារជាតិមានកីឡាករបរទេស៤នាក់ សុទ្ធតែកូរ៉េខាងជើងទាំងអស់៕
