ការបញ្ចប់ក្នុងលទ្ធផលស្មើនៅពេលប្រកួតជាមួយនឹងក្រុម Leicester និង Burnley នៅចន្លោះថ្ងៃនៃបុណ្យណូអែល បានធ្វើឲ្យក្រុម Man United កាន់តែមានឱកាសស្តួចស្តើងក្នុងការប្រជែងពានជាមួយនឹងក្រុម Manchester City ហើយការបញ្ចប់ក្នុងលទ្ធផលស្មើ ០-០ ក្នុងផ្ទះខ្លួនឯងនៅពេលប្រកួតជាមួយនឹងក្រុម Southampton មានន័យថា បច្ចុប្បន្នពួកគេកំពុងតែស្ថិតក្នុងចំណាត់ថ្នាក់លេខ ៣ នៅលើតារាង ដោយដេញតាមពីក្រោយក្រុម Man City ដល់ទៅ ១៥ ពិន្ទុ។
បញ្ហាផ្សេងៗកំពុងតែកើតឡើងកាន់តែច្រើនសម្រាប់អ្នកចាត់ការទូទៅ លោក Jose Mourinho ខណៈដែលបញ្ហារបួសជង្កង់របស់ខ្សែប្រយុទ្ធ Zlatan Ibrahimovic នឹងធ្វើឲ្យរូបគេអវត្តមានរយៈពេល ១ ខែ ហើយ Romelu Lukaku ត្រូវបានសែងចេញពីទីលានប្រកួត ក្រោយពីប៉ះទង្គិចក្បាលជាមួយនឹងកីឡាករ Wesley Hoedt។
Content image - Phnom Penh Post
ខ្សែប្រយុទ្ធ Anthony Martial (ឆ្វេង) របស់ Man United ដណ្តើមបាល់ជាមួយ Pierre-Emile Hojbjerg របស់ Southampton។ AFP
ខ្សែបម្រើស្លាបស្តាំ Ashley Young នឹងត្រូវអវត្តមានសម្រាប់ការប្រកួត៣លើកបន្ទាប់ទៀតរបស់ Man United ក្រោយពីទទួលយកការចោទប្រកាន់លើការប្រព្រឹត្តអំពើហិង្សា ក្រោយពីរូបគេហាក់បានវាយមួយកែងទៅលើខ្សែបម្រើ Dusan Tadic ក្នុងការប្រកួតកាលពីថ្ងៃសៅរ៍។
Everton នឹងក្លាយជាគូប្រកួតបន្ទាប់របស់ Man United នាកីឡដ្ឋាន Goodison Park នៅរាត្រីនេះ ហើយ Pogba បានទាមទារឲ្យមានការបង្ហាញពីទម្រង់លេងកាន់តែល្អប្រសើរពីក្រុមរបស់គេ បើទោះបីក្នុងចន្លោះពេលដ៏ខ្លីក៏ដោយ។
ខ្សែបម្រើអន្តរជាតិបារាំងរូបនេះ បានប្រាប់ទូរទស្សន៍ MUTV ថា៖ «យើងមិនចាញ់ឡើយ ប៉ុន្តែ យើងត្រូវតែភ្ញាក់ខ្លួនឡើង ដោយត្រូវវាយទៅកាន់ជ័យជម្នះ។ យើងបានស្មើម្តងទៀត។ ស្មើ ៣ លើក យើងត្រូវតែឈ្នះ យើងត្រូវតែផ្លាស់ប្តូរ ហើយយើងត្រូវតែផ្លាស់ប្តូរដើម្បីឈ្នះ»។
