ខ្សែប្រយុទ្ធជើងចាស់របស់ក្រុមបឹងកេត ឃួន ឡាបូរ៉ាវី ថា ការប៉ះជាមួយក្រុមក្រសួងការពារជាតិវគ្គផ្ដាច់ព្រ័ត្រយប់មិញនេះ ជាការប្រកួតមួយយ៉ាងលំបាកបំផុត បើប្រៀបធៀបការប្រកួតនានាច្រើនឆ្នាំកន្លងទៅនេះ។
ឃួន ឡាបូរ៉ាវី បានឲ្យដឹងថា ការប្រកួតវគ្គផ្ដាច់ព្រ័ត្រជាមួយក្រុមទ័ពយប់មិញនេះពិបាកបំផុត និងមានសម្ពាធខ្លាំងថែមទៀត។ ជាពិសេសនៅពេលទាត់បាល់កាត់សេចក្តី១១ម៉ែត្រ។ បើគិតពីប្រកួតសំខាន់ៗសម្រាប់ខ្សែប្រយុទ្ធខាងលើនេះមានរាប់មិនអស់មិនថាការប្រកួតនៅក្នុងប្រទេស ឬនៅក្រៅប្រទេសនោះទេ ប៉ុន្តែវាមិនសូវពិបាក និងមានសម្ពាធខ្លាំងដូចនេះឡើយ។
ខ្សែប្រយុទ្ធដែលជួយឲ្យបឹងកេតឈ្នះពានយប់មិននេះបន្តថា រាល់ដងការប្រកួតវគ្គផ្ដាច់ភាគច្រើនទាត់បាល់កាត់សេចក្ដី១១ម៉ែត្រ ត្រឹម៥គ្រាប់គឺដឹងចាញ់ឈ្នះហើយ ប៉ុន្តែយប់មិញទាត់រហូតដល់ជាង១០គ្រាប់ទើបរកឃើញអ្នកឈ្នះ ហើយណាមួយគ្រាប់ដំបូងរបស់ខ្លួនស៊ុតមិនចូលទៀត ដូច្នេះវារឹតតែមានសម្ពាធកាន់តែខ្លាំង។ កីឡាកររូបនេះសប្បាយរីករាយជាខ្លាំងនៅពេលដែលក្រុមបានលើកពានលីគកំពូលពីរឆ្នាំជាប់គ្នាដូចនេះ ហើយរដូវកាលថ្មីក្រុមទាំងមូលនឹងមានការកែប្រែនិងធ្វើបានល្អជាងនេះ។
លីគកំពូលរបស់កម្ពុជាឆ្នាំ ២០១៦-២០១៧ នេះបានបញ្ចប់ទៅហើយកាលពីយប់មិញ ដោយក្រុមបឹងកេត យកឈ្នះក្រុមក្រសួងការពារជាតិដោយទាត់បាល់កាត់សេចក្ដី១១ម៉ែត្រដោយគ្រាប់បាល់១០-៩ បន្ទាប់ក្រុមទាំងពីរប្រកួតគ្នាអស់រយៈពេល១២០នាទីនៅតែស្មើ ១-១ ៕