ខេត្តបាត់ដំបង ៖ សេចក្ដីរាយការណ៍បឋមឱ្យដឹងថា ប្រជាពលរដ្ឋបានប្រទះឃើញសាកសពស្ត្រីម្នាក់ ដែលមានស្នាមកាប់លើក្បាលផង កាលពីវេលាម៉ោងរសៀលថ្ងៃទី២៧ ធ្នូ ស្ថិតនៅវាលស្រែមួយកន្លែង នៅខាងមុខផ្ទះគាត់ ក្នុងភូមិបត់រកា ឃុំខ្នាចរមាស ស្រុកបវេល ។
សាកសពស្ត្រីខាងលើ ត្រូវគេស្គាល់ឈ្មោះហូន រ៉ានី អាយុ៣០ឆ្នាំ មានស្វាមីឈ្មោះផស់ ដែលមានផ្ទះនៅដាច់ឆ្ងាយពីគេប្រហែល៤០០ម៉ែត្រ ។ សេចក្ដីរាយការណ៍បន្តទៀតថា ស្រីរងគ្រោះមានផ្ទៃពោះ៨ខែ ដែលគេអះអាងថា ជាកូនភ្លោះផង ។ សាកសពមានស្នាមកាប់ជាច្រើនពូថៅលើក្បាល និងលើផ្ទៃមុខ គឺស្របពេលប្ដីរបស់គាត់ដឹកឪឡឹកទៅលក់នៅឯផ្សារ ។ ពេលដែលកើតហេតុ គឺស្ត្រីរងគ្រោះនៅជាមួយកូនស្រីអាយុជាង២ឆ្នាំ ហើយកូនស្រីគាត់ក៏រងរបួសដែរ ពេលនេះត្រូវអ្នកភូមិជួយនាំទៅមន្ទីរពេទ្យហើយ។
ពេលនេះ សមត្ថកិច្ចកំពុងត្រូតពិនិត្យសាកសព និងនៅជុំវិញទីតាំងកើតហេតុ ។ បើតាមសេចក្ដីរាយការណ៍ថា សមត្ថកិច្ចបានរកឃើញពូថៅ១ ដែលប្រឡាក់ដោយឈាមនៅក្បែរគ្រែក្នុងផ្ទះជនរងគ្រោះ។ ប៉ុន្តែសមត្ថកិច្ចមិនទាន់ហ៊ានសន្និដ្ឋានបែបណាទេ ជុំវិញករណីនេះ ព្រោះកំពុងសួរនាំ និងប្រមូលវត្ថុតាងទៀត ។