លោកស្រី ឆាយ ស៊ីវលីន ជាប្រធានសមាគមទីភ្នាក់ងារទេសចរណ៍កម្ពុជា បានបញ្ជាក់ប្រាប់ នារសៀលថ្ងៃទី២៦ ខែធ្នូឆ្នាំ ២០១៧ថា ការកក់ទុកដំណើរកម្សាន្តរបស់ប្រជាជនកម្ពុជាទៅកាន់បរទេសមានការកើនឡើងបើធៀបនឹងកំឡុងពេលចូលឆ្នាំសកលឆ្នាំមុន ជាពិសេសវាកើនឡើងទាំងចំនួន និងវ័យរបស់ពួកគាត់ផងដែរ ដោយក្នុងឆ្នាំមុនៗភាគច្រើនជាមនុស្សស្ថិតក្នុងមជ្ឈិមវ័យ ហើយសព្វថ្ងៃមានការកើនឡើងនូវចំនួនមនុស្សស្ថិតក្នុងវ័យក្មេង។
លោកស្រីបន្តថា ប្រជាជនកម្ពុជាដែលធ្វើការកក់ទុកទាំងនេះ ភាគច្រើនរស់នៅក្នុងរាជធានីភ្នំពេញ និងខេត្តកណ្ដាល ហើយពួកគាត់មានជីវភាពពីមធ្យមឡើងទៅ ដោយអ្នកខ្លះមានមុខរបរជាបុគ្គលិកក្រុមហ៊ុន និងជាអជីវករ។ លោកស្រីបន្ថែមថា ការកើនឡើងនូវចំនួនប្រជាជនកម្ពុជាកក់ទុកដំណើរកំសាន្តទៅកាន់បរទេសនេះ ឆ្លុះបញ្ចាំងថាប្រជាជនកម្ពុជាមានជីវភាពធូរធារ និងការចង់ទទួលបានអ្វីថ្មីៗផងដែរ។
ក្រៅពីជីវភាពប្រជាជនកម្ពុជាមានភាពកាន់ប្រសើរ ការហោះហើរត្រង់ និងការសម្រួលពីភ្នាក់ងារទេសចរណ៍ក៏ជាកត្តាជំរុញឲ្យមានការកើនឡើងប្រជាជនកម្ពុជាជ្រើរើសទៅកំសាន្តបរទេសកំឡុងពេលចូលឆ្នាំសកលផងដែរ។
លោកស្រីបន្ថែមថា បណ្ដាប្រទេសគោលដៅនៃការកក់ទុកដំណើរកម្សាន្តរបស់ប្រជាជនកម្ពុជាកំឡុងពេលចូលឆ្នាំសកលមានដូចជាប្រទេស ថៃ ម៉ាឡេស៊ី សិង្ហបុរី ចិន តៃវ៉ាន់ និងប្រទេសជប៉ុនជាដើម។
ទន្ទឹមមានការកក់ទុកដំណើរកំសាន្តទៅកាន់បរទេសរបស់ប្រជាជនកម្ពុជាមានការកើនឡើងក្ដី ភ្ញៀវបរទេសក៏មានចំនួនច្រើនដែលនឹងមកទស្សនាប្រទេសកម្ពុជាក្នុងកំឡុងចូលឆ្នាំសកលខាងមុខនេះផងដែរ។ លោកស្រីក៏សំណូមពរឲ្យមានការចូលរួមពីគ្រប់ភាគីក្នុងការគ្រប់គ្រងសំរាម ដោយលោកស្រីបញ្ជាក់ថា សំរាមជាសត្រូវរបស់ទេសចរណ៍ និងព្យាយាមធ្វើយ៉ាងណាបង្កើតវត្ថុអនុស្សាវរីយ៍ឲ្យបានកាន់តែប្រសើរដើម្បីទាក់ទាញភ្ញៀវទេសចរឲ្យពន្យារការស្នាក់នៅបានកាន់តែយូរ៕ប្រភព៖ BayonTV
