ការសន្យារបស់លោក វ៉ាង វៃគួង យ៉ាងដូច្នេះគឺបានធ្វើឡើងនៅក្នុងកិច្ចជំនួបជាមួយសម្តេចក្រុមព្រះនរោត្តម រណ ឬទ្ធិព្រះប្រធានគណបក្សហ្វ៊ុនស៊ិនប៉ិចនាថ្ងៃទី២៥ ខែធ្នូ ឆ្នាំ២០១៧នេះនៅសណ្ឋាគារអ៊ិនធើកុងទីណងតាល់រាជធានីភ្នំពេញ។
ថ្លែងប្រាប់អ្នកសារព័ត៌មានក្រោយពីកិច្ចជំនួបនោះ សម្តេចក្រុមព្រះនរោត្តម រណ ឬទ្ធិបានមានបន្ទូលថា ចិននៅតែបន្តជួយដល់គណបក្សរបស់ព្រះអង្គដដែលដោយសារតែភាគីចិនបានចាត់ទុកថាគណបក្សរាជានិយមមួយនេះ គឺជាស្នាព្រះហស្តរបស់ព្រះមហាវិរៈក្សត្រព្រះបរម រតនកោដ្ឋ និងក៏ជាដៃគួរជាមួយគ្នាអស់រយៈពេលជាយូរណាស់មកដែរ។
សម្តេចក្រុមព្រះបានមានបន្ទូលទៀតថា នៅក្នុងកិច្ចជំនួបនោះព្រះអង្គបានស្នើរដល់ភាគីចិនឲ្យបន្តជួយដល់គណបក្សហ្វ៊ុនស៊ិនប៉ិច នៅក្នុងអំឡុងពេលបោះឆ្នោតាសាកលឆ្នាំ២០១៨ខាងមុខនេះខណៈព្រះអង្គអះអាងប្រាប់ភាគីចិនថា គណបក្សរបស់ព្រះអង្គថ្វីត្បិតតែទទួលបានអាសនៈដោយតុលាការសម្រេចប្រគល់ឲ្យមែនតែធនធានគឺមានការខ្វះខាត់ច្រើន។
ព្រះអង្គម្ចាស់នរោត្តម រណ ឬទ្ធិបានមានបន្ទូលទៀតថាជាការឆ្លើយតបលោកវ៉ាង វៃគួង នឹងយកដំណឹងនេះទៅប្រាប់ដល់ឯកឧត្តម ស៊ី ជីនពីងប្រធានាធិបតីនៃសាធារណរដ្ឋប្រជាមានិតចិន។ តែយ៉ាងណាក្តីចិននៅតែជួយគាំទ្រជានិច្ចចំពោះគណបក្សហ្វ៊ុនស៊ិនប៉ិច ដោយសារតែគណបក្សនេះគឺជាដៃគួរជាយូរណាស់មកហើយរបស់ចិននោះ។
បើតាមសម្តេចក្រុមព្រះនរោត្តម រណ ឬទ្ធិព្រះប្រធានគណបក្សបានមានបន្ទូលឲ្យដឹងទៀតថានាពេលកន្លងទៅ ប្រទេសចិនបានជួយដល់គណបក្សរាជានិយមហ្វ៊ុនស៊ិនប៉ិចជាច្រើន ដូចសម្ភារៈការិយាល័យ សម្ភារៈសិក្សា និងជំនួយផ្នែកធនធានជាច្រើនទៀត។
នៅក្នុងកិច្ចជំនួបប្រហែលមួយម៉ោងនោះដែរ លោក វ៉ាង វៃគួង ក៏បានរៀបរាប់អំពីភាពជោគជ័យរបស់រដ្ឋាភិបាលចិននាពេលបច្ចុប្បន្នហើយលោក គួងក៏បានរំពឹងថាទំនាក់ទំនងរវាង គណបក្សកុម្មុយនីស្តចិន និងគណបក្សហ្វ៊ុនស៊ិនប៉ិចនៅតែបន្តមានជារៀងរហូតផងដែរ៕
