ក្នុងពិធីប្រគល់វិញ្ញាបនបត្របញ្ជាក់ការសិក្សាដល់សមាជិកសមាគម អ្នកលក់ឱសថកម្ពុជាជំនាន់ទី៣ប្រមាណជាង៧០០នាក់ នៅសាលមហោស្រព ចេនឡា កាលពីថ្ងៃទី២៤ ខែធ្នូ ម្សិលម៉ិញ ឯកឧត្តម ឃួង ស្រេង អភិបាលរាជធានីភ្នំពេញ បានបន្តប្ដេជ្ញា និងក្រើនរំលឹកដល់មន្ត្រីជំនាញពាក់ព័ន្ធក្រោមឱវាទឲ្យបន្តរិតបន្តឹងការអនុវត្តច្បាប់ និងគ្រប់គ្រងឱសថទាំងស្ថាប័នរដ្ឋ និងឯកជនឲ្យបានត្រឹមត្រូវ នឹងមានប្រសិទ្ធភាព ដើម្បីធានាការពារដល់សុខភាព និងសុខុមាលភាពរបស់ប្រជាជននៅក្នុង រាជធានីភ្នំពេញ។
ឯកឧត្ដមដាក់បទបញ្ជាឲ្យមន្ត្រីពាក់ព័ន្ធបន្តចុះស្រាវជ្រាវ និងដកហូតឱសថក្លែងក្លាយឱសថខុសច្បាប់ ឱសថដែល មានការហាមឃាត់ ឱសថដែលមានគុណភាពអន់ និងផុតកំណត់ប្រើប្រាស់ ព្រោះឱសថជាអាវុធមុខពីរ បើប្រើប្រាស់មិនបានត្រឹមត្រូវ និងខូចគុណភាព នឹងបង្កទុក្ខទោសធ្ងន់ធ្ងរដល់សុខភាពប្រជាពលរដ្ឋ។
ឯកឧត្តម ឃួង ស្រេង បានបញ្ជាក់ថា កន្លងមកក្រសួងសុខាភិបាល រដ្ឋបាលសាលារាជធានីភ្នំពេញ បានបន្តខិតខំយកចិត្តទុកដាក់លុបបំបាត់ក្រុមហ៊ុនឱសថ និងឱសថស្ថានដែល មិនគោរពច្បាប់របស់ក្រសួងដូចជាលក់ឱសថគ្មានលេខបញ្ជីរការ ផ្សព្វផ្សាយ ឱសថគ្នានច្បាប់អនុញ្ញាតិ និងចុះស្រាវជ្រាវ ដកហូតឱសថក្លែងក្លាយ និងខុសច្បាប់ឱសថខូចគុណភាព យកទៅបំផ្លាញចោលជាច្រើនផងដែរ។
បើតាមលោក បណ្ឌិត ឡី សុភាព ប្រធានសមាគមអ្នកលក់ឱសថ និងជាប្រធាន សមាគមសហព័ន្ធវិនិយោគិនបានឲ្យដឹងថា វគ្គបណ្តុះបណ្តាលមូលដ្ឋានសម្រាប់ អ្នកលក់ឱសថតាមឱសថស្ថានគឺក្នុងគោលបំណងដើម្បីបង្កើននូវចំណេះដឹង ដល់អាជីវករលក់ឱសថ និងដើម្បីឆ្លើយតបទៅនឹងគោលការណ៍អនុវត្តល្អក្នុង សេវាកម្មឱសថរបស់ក្រសួងសុខាភិបាល និងធានាដល់ការយកចិត្តទុកដាក់គិត គូពីសុវត្ថិភាពសុខភាពប្រជាពលរដ្ឋ ក៍ដូចជាបង្កាគ្រោះថ្នាក់ជាយថាហេតុផ្តើម ចេញពីការប្រើប្រាស់ឱសថ។ ជាមួយនេះក៍ជួយពង្រឹងសមត្ថភាពជំនាញវិជ្ជាជីវៈ និងក្រមសីលធម៌វិជ្ជាជីវៈដល់សិក្ខាកាមដែលនឹងក្លាយជាអ្នកបម្រើសេវាសុខភាព ផ្ទាល់ជាមួយពលរដ្ឋក្នុងការយកទៅប្រឹក្សាយោបល់ជាមួយប្រជាពលរដ្ឋ៕ប្រភព៖ BayonTV
