រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរស4នាក់ត្រូវបានកម្លាំងនគរបាលខណ្ឌសែនសុខ ឃាត់ខ្លួនជាបន្តបន្ទាប់ ដោយជាប់សង្ស័យក្នុងរឿងឃាតកម្មរំលោភសម្លាញ់នារីម្នាក់នៅក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។ ទោះបីជាយ៉ាងណា ជនសង្ស័យពុំទាន់សារភាពនៅឡើយ។
បើតាមនគរបាលឱ្យបានដឹងថា ជនសង្ស័យ៣នាក់ត្រូវបានឃាត់ខ្លួននៅវេលាម៉ោង៤និង៣០រសៀល ថ្ងៃទី២៣ ធ្នូ និងម្នាក់ទៀតឃាត់ខ្លួននៅវេលាម៉ោង៩និង៣០នាទីព្រឹក ថ្ងៃទី២៤ ធ្នូនេះ។
នគរបាលបានឱ្យដឹងទៀតថា ជនសង្ស័យដែលត្រូវឃាត់ខ្លួនសុទ្ធតែផ្ទុកសារធាតុញៀន ហើយជនសង្ស័យទាំងនោះពុំទាន់សារភាពនៅឡើយ។
គួរបញ្ជាក់ថា នៅវេលាល្ងាចថ្ងៃទី២២ ធ្នូ នារីរងគ្រោះម្នាក់ត្រូវប្រជាពលរដ្ឋប្រទះឃើញដេកស្លាប់ទាំងអាក្រាតនៅក្រោមកាំជណ្តើរបាក់បែកទុកចោល នៅតាមផ្លូវរថភ្លើងក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
នារីរងគ្រោះខាងលើឈ្មោះថា ឈុន មុំសុខស៊ីវុត្ថា អាយុ២៧ឆ្នាំ ជាអ្នកលាងចានតាមរោងការ ស្នាក់នៅផ្ទះលេខ២៣១ ផ្លូវលំ ក្រុមទី៥ ភូមិបុរី១០០ខ្នង់ សង្កាត់ទឹកថ្លា និងមានស្រុកកំណើតនៅស្រុកកោះអណ្តែត ខេត្តតាកែវ។
បន្ទាប់ពីប្រទះឃើញសពនគរបាលជំនាញបានចុះត្រួតពិនិត្យ ហើយបានសន្និដ្ឋានថាស្ត្រីរងគ្រោះត្រូវបានឃាតកររឹត.កសម្លាប់ បន្ទាប់ពីចាប់រំលោភសេពសន្ថវៈរួច។ ឃាតករមានគ្នាប្រមាណ២ទៅ៣នាក់អាចជាមនុស្សញៀនថ្នាំ ហើយបានធ្វើសកម្មភាពចាប់នារីរងគ្រោះនៅពេលដែលនាងធ្វើដំណើរតែម្នាក់ឯង៕