ខេត្តឧត្តរមានជ័យ ៖ ឱពុកបង្កើតមានចិត្តជាសត្វតិរច្ឆានបានចាប់រំលោភសេពសន្ថវៈលើកូនស្រីរបស់ខ្លួនដែលមានវ័យ១៥ឆ្នាំ ហើយត្រូវប៉ូលិសស្រុកត្រពាំងប្រាសាទ ធ្វើការឃាត់ខ្លួនបានកាលពីវេលាម៉ោង១០ព្រឹក ថ្ងៃទី២៤ ធ្នូ ហេតុការណ៍នេះបានកើតឡើងស្ថិតក្នុងស្រុកត្រពាំងប្រាសាទ ខេត្តឧត្តរមានជ័យ។
សមត្ថកិច្ចបានឱ្យដឹងថា ជនសង្ស័យជាឪពុកបង្កើតឈ្មោះ សួន ធា អាយុ៣៦ឆ្នាំ ចំណែកឯក្មេងស្រីរងគ្រោះអាយុ១៥ឆ្នាំ ។
យោងតាមសម្តីក្មេងស្រីរងគ្រោះបានឱ្យដឹងថា ខ្លួនជាកូនច្បងក្នុងចំណោមកូន៣នាក់ ហើយកន្លងទៅនេះ ឱ្យតែបងប្អូន ឬម្តាយមិននៅផ្ទះ ដឹងតែឪពុករូបនេះតែងតែចាប់រំលោភសេពសន្ថវៈធ្វើឱ្យរូបនាងអត់ទ្រាំមិនបានឡើយ ក៏សម្រេចចិត្តដើរមកប៉ុស្តិ៍រដ្ឋបាលសាលាឃុំអូរសោមដាក់ពាក្យបណ្តឹងពីទង្វើរបស់ឪពុកដែលមានចិត្តតិរិច្ឆានដូចសត្វធាតុបែបនេះ។
ចំណែកប៉ូលិសស្រុកត្រពាំងប្រាសាទបានឱ្យដឹងថា ក្រោយពីបានទទួលនូវពាក្យបណ្តឹងពីក្មេងស្រីរងគ្រោះភ្លាម សមត្ថកិច្ចបានចុះទៅធ្វើការនាំខ្លួនជនសង្ស័យដែលជាឪពុកមកអធិការស្រុក ដើម្បីធ្វើការសាកសួរ។ យោងតាមការសាកសួរជនសង្ស័យបានសារភាពថា ខ្លួនពិតជាបានចាប់រំលោភសេពសន្ថវៈលើកូនស្រីបង្កើតខ្លួនឯងដូចការចោទប្រកាន់មែន។
បច្ចុប្បន្នសមត្ថកិច្ចបានកសាងសំណុំរឿងបញ្ជូនជនសង្ស័យទៅតុលាការអមសាលាដំបូងខេត្ត ដើម្បីចាត់ការតាមនូតិវិធីច្បាប់។
