ចោរ២នាក់ដោះខ្នោះដៃលោតចុះពីឡានកំពុងលឿន តែព្រះមិនជួយ
25/12/2017
រាជធានីភ្នំពេញ ៖ ជនសង្ស័យ២នាក់ជាអ្នករើសអេតចាយ និងជាមុខសញ្ញាគាស់បន្ទប់ជួលយ៉ាងសកម្មត្រូវសមត្ថកិច្ចឃាត់ខ្លួន ហើយដឹកតាមរថយន្តបញ្ជូនទៅអធិការដ្ឋានខណ្ឌ ស្រាប់តែជនសង្ស័យដោះខ្នោះលោតចេញពីរថយន្ត បណ្តាលឲ្យម្នាក់សន្លប់នៅលើថ្នល់ និងម្នាក់ទៀតរត់គេចខ្លួនត្រូវប្រជាពលរដ្ឋវាយទ្រពខ្លួន បង្កឲ្យមានការភ្ញាក់ផ្អើល កាលពីវេលាម៉ោង១១និង៣០នាទីយប់ ថ្ងៃទី២៤ ធ្នូ តាមបណ្តោយលំ ចំណុចភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ។
ជនសង្ស័យទី១-ឈ្មោះ ប៊ូ វឿន ភេទប្រុស អាយុ៣០ឆ្នាំ មុខរបរកម្មករសំណង់ មានទីលំនៅផ្ទះជួលភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ជាម្ចាស់ដាវ និងកាបូបដែលមានសម្ភារមួយចំនួន ដូចជាសោរអក្សរតេ១ ដែកឆ្កឹះបន្ទប់មាន៨សោរ ចំណែកជនសង្ស័យទី២-ឈ្មោះ ឌូ ឌឿន ភេទប្រុស អាយុ៣៧ឆ្នាំ ជាកម្មករសំណង់ ស្នាក់នៅជាមួយបងនៅក្នុងបន្ទាយយោធា៩១ ភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ។
តាមសម្ដីជនសង្ស័យទី១ ពាក់អាវពណ៌ខ្មៅ បានឱ្យដឹងថា រូបគេ និងបក្សពួក២នាក់ទៀតបានអូសរទេះដើររើសអេតចាយតាមផ្លូវលំ ខណៈពេលអូសរទេះចេញពីកន្លែងស្នាក់នៅបានបន្តិចក៏ជួបស្ត្រីម្នាក់ជាម្ចាស់ផ្ទះជួល ពេលឃើញមុខពួកគេស្គាល់ថា ជាជនសង្ស័យធ្លាប់លួចរបស់របរជាច្រើនលើកច្រើនសាមកហើយ ជាពិសេសមើលតាមប្រព័ន្ធកាមេរ៉ាសុវត្ថិភាពរាល់ពេលក៏ឃាត់ខ្លួនឆែកឆេររកឃើញមានសម្ភារៈក្នុងកាបូបស្ពាយមានសុទ្ធតែឧបករណ៍ ដូចជាដាវសាំម៉ូរ៉ៃ១ដើម និងកាំបិតផ្គាស់១ដើម និងសោរអក្សរតេ១ ដែកសម្រាប់ឆ្កឹះបន្ទប់ជួលចំនួន៨ ក៏ឃាត់ខ្លួនរូបគេវាយទ្រពខ្លួន ចំណែកបក្សពួក២នាក់ទៀតរត់គេចខ្លួនបាត់ ។
តាមសម្ដីពីជនសង្ស័យទី២បានឱ្យដឹងថា រូបគេបានដើរមកលេងផ្ទះមិត្តភក្តិនៅជិតខាងបន្ទាយយោធា៩១ ខណៈពេលមកដល់កន្លែងកើតហេតុ ស្រាប់តែឮសូរសំឡេងប្រជាពលរដ្ឋអ៊ូរអរ រូបគេក៏ទៅឈរមើលត្រូវគេឃើញស្រែកថា រូបគេជាបក្សពួករបស់ជនសង្ស័យទី១ ក៏ដេញចាប់រូបគេធ្វើឲ្យគេរត់គេចចូលបន្ទប់ជួល ក៏ត្រូវប្រជាពលរដ្ឋដេញចាប់បាន ។
ក្រោយពេលកើតហេតុសមត្ថកិច្ចបាននាំជនសង្ស័យទាំង២នាក់នៅសួរនាំនៅប៉ុស្តិ៍នគរបាលចោមចៅ៣ ប៉ុន្តែជនសង្ស័យទាំង២នាក់មិនព្រមសារភាពទេ ពួកគេអត់បានដើរគាស់បន្ទប់ជួលគេដូចការចោទប្រកាន់ទេ ។
ទោះបីជាយ៉ាងណាសមត្ថកិច្ចបានកសាងសំណុំរឿងបញ្ជូនជនសង្ស័យទៅអធិការដ្ឋានខណ្ឌពោធិ៍សែនជ័យ ដោយសមត្ថកិច្ចដឹកតាមរថយន្តសាំយ៉ុងមួយគ្រឿង ក្នុងនោះជនសង្ស័យ២នាក់ដាក់ខ្នោះតែមួយ និងសមត្ថកិច្ច៣នាក់ ខណៈពេលដឹកមកដល់ពាក់កណ្តាលផ្លូវមុខព្រលានយន្តហោះអន្តរជាតិភ្នំពេញ ជនសង្ស័យបានដោះខ្នោះចេញពីគ្នាលោតពីលើរថយន្តសាំយុងកំពុងតែបើក្នុងល្បឿនលឿន បណ្តាលឲ្យជនសង្ស័យទី២ ដួលសន្លប់ស្តូកស្តឹងនៅលើផ្លូវត្រូវបញ្ជូនទៅមន្ទីរពេទ្យ ។ ចំណែកជនសង្ស័យម្នាក់ទៀតត្រូវសមត្ថកិច្ចតាមចាប់យកមកវិញភ្លាមៗ តែត្រូវប្រជាពលរដ្ឋវាយមួយដៃមួយជើងរងរបួសធ្ងន់ ។
