បុរសម្នាក់ត្រូវរថយន្តសាំយុងបុកប៉ើងជាង១០ម៉ែត្រស្លាប់ភ្លាមៗ នៅនិងកន្លែងកើតហេតុ ខណៈដែលជិះម៉ូតូឆ្លងថ្នល់ ។
តាមប្រភពពីកន្លែងកើតហេតុបានឲ្យដឹងថានៅមុនពេលកើតហេតុ បុរសរងគ្រោះ បានជិះម៉ូតូសង់សេរីចាស់ ពណ៌ ឈាមជ្រូក គ្មានស្លាកលេខ ធ្វើដំណើរពីត្បូងទៅជើង ឆ្លងថ្នល់លុះមកខាងជើងផ្លូវ ហើយស្របពេលនោះ មានរថយន្តម៉ាក ស៊ាំយ៉ុង ពណ៍សលាយទឹកប្រាក់ មិនស្គាល់ផ្លាកលេខ បើកបរពីកើតទៅលិច បុកចំពីចំហៀងខាងស្តាំ ប៉ើងមនុស្សជាង១០ម៉ែត្រ បណ្តាលឲ្យស្លាប់ភ្លាម នៅនិងកន្លែងកើតហេតុតែម្តង ក្រោយពីបង្កហេតុ រថយន្តមិនបានឈប់នោះទេ រួចបន្ថែមល្បឿន បើករត់គេចបាត់ស្រមោលទៅ។
សមត្ថកិច្ចបានឲ្យដឹងថា ជនរងគ្រោះមានឈ្មោះ លី ចំរើន ភេទប្រុស អាយុ៥៥ឆ្នាំ មុខរបរកសិករ រស់នៅភូមិបាក់រនាស់ សង្កាត់សង្ឃ័រ ក្រុងស្វាយរៀង ខេត្តស្វាយរៀង បើកម៉ូតូឆ្លងផ្លូវពីត្បូងទៅជើង ស្លាប់នៅកន្លែងកើតហេតុ ( ម៉ូតូខូចខាតធ្ងន់ )។ មធ្យោបាយ រក្សាទុក នៅការិយាល័យចរាចរណ៍ខេត្តស្វាយរៀង ។
ចំពោះរថយន្តសមត្ថកិច្ច ធ្វើការស្រាវជ្រាវ និងតាមចាប់យកមកដោះស្រាយគ្នា តាមនិតិវិធីច្បាប់។ សាកសពត្រូវបានកម្លាំងចរាចរណ៍ ខេត្តស្វាយរៀង ដឹកទៅគេហដ្ឋាន នៅភូមិបាក់រនាស់ សង្កាត់សង្ឃ័រ ក្រុងស្វាយរៀង ធ្វើបុណ្យតាមប្រពៃណី៕អត្ថបទ ទេព វណ្ណះ
