ស្លាប់ម្នាក់របួសធ្ងន់ម្នាក់ ក្នុងករណីគ្រោះថ្នាក់ចរាចរណ៍
10/12/2017
ខេត្តកំពង់ចាម ៖ បុរសម្នាក់បានស្លាប់ភ្លាមៗ រួមនឹងស្ត្រីម្នាក់របួសធ្ងន់នៅក្នុងហេតុការណ៍គ្រោះថ្នាក់ចរាចរណ៍ដែលបានកើតឡើងនៅថ្ងៃទី១០ ធ្នូ ២០១៧ វេលាម៉ោង២រសៀល នៅលើផ្លូវជាតិលេខ៧ ចន្លោះ គីឡូម៉ែតលេខ៧៩-៨០ ភូមិត្រពាំងត្មាត ឃុំស្រម៉ ស្រុកជើងព្រៃ ខេត្តកំពង់ចាម រវាងរថយន្តមិនស្គាល់ម៉ាកមកបុកម៉ូតូយ៉ាងពេញទំហឹង។
នគរបាលចរាចរណ៍ស្រុកជើងព្រៃបានឱ្យដឹងថា រថយន្តបានបើកពីទិសខាងកើតទៅទិសខាងលិចបុកម៉ូតូម៉ាកស្មាស ពាក់ស្លាកលេខ ភ្នំពេញ 1L-7332 បើកបរដោយឈ្មោះ ទូចផូ ភេទប្រុស អាយុ៣៨ឆ្នាំ ទីលំនៅភូមិស្តុកអន្លង់ ឃុំល្វាស្រុកព្រៃឈរ ខេត្តកំពង់ចាម។ ដែលបានបើកបរក្នុងទិសដៅច្រាសគ្នាពីលិចទៅកើត(គ្មានពាក់មួកសុវត្ថិភាព) ផ្លោងមនុស្សចេញពីម៉ូតូបោកក្បាលនឹងថ្នល់បណ្ដាលឲ្យស្លាប់បុរសអ្នកឌុបនៅនឹងកន្លែង ចំណែកស្ត្រីដែលអង្គុយពីក្រោយរបួសធ្ងន់ឈ្មោះ ទូច ធាអាយុ៣៧ឆ្នាំ។
នគរបាលបានប្រាប់បន្តថា រថយន្តបង្កមិនបានឈប់នោះទេ គឺបានបន្ថែមល្បឿនបើករត់គេចបាត់តែម្តង រីឯម៉ូតូវិញបានខូចខាតស្ទើរទាំងស្រុង។ មូលហេតុករណីគ្រោះថ្នាក់ចរាចរណ៍នេះ បណ្ដាលមកពីរថយន្ដបើកមិនប្រកាន់ស្តាំបណ្តាលឲ្យទៅបុកម៉ូតូបើកច្រាសទិសតែម្តង។ ក្រោយពេលកើតហេតុរថយន្តបង្កបានបើកគេចចេញពីកន្លែងកើតហេតុបាត់ មន្ត្រីជំនាញកំពុងធ្វើការស្រាវជ្រាវដើម្បីកំណត់អត្តសញ្ញាណមានប្រភពមកពីណា។
