វរសេនាតូចការពារព្រំដែនគោក៨១៥ បើកវគ្គសិក្សាជំនាញរយៈពេលខ្លី
27/11/2017
ខេត្តបន្ទាយមានជ័យ ៖ ដើម្បីក្រើនរំលឹកពីយុទ្ធសាស្ត្រ និងយុទ្ធវិធីប្រយុទ្ធ របស់កងកម្លាំងប្រដាប់អាវុធ ពិសេសគឺកងកម្លាំងនគរបាលការពារព្រំដែនគោក។ ថ្ងៃទី២៧ ខែវិច្ឆិកា ឆ្នាំ២០១៧ នៅបញ្ជាការដ្ឋាននគរបាលការពារព្រំដែនគោកលេខ៨១៥ បានបើកវគ្គហ្វឹកហ្វឺនក្នុងរយៈពេលខ្លី ក្រោមអធិបតីភាព លោកឧត្តមសេនីយ៍ត្រី រ៉ែន វីរៈ ស្នងការរង ទទួលផែនការងារព្រំដែនគោក តំណាងលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ដោយមានការចូលពីលោក អ៊ុក សម្បត្តិ អភិបាលរងស្រុកម៉ាឡៃ និងបណ្តាថ្នាក់ដឹកនាំជាច្រើនទៀត។
តាមរបាយការណ៍របស់លោកវរសេនីយ៍ឯក ឈិត លី មេបញ្ជាការវរសេនាតូចនគរបាលការពារព្រំដែនគោកលេខ៨១៥ បានធ្វើសេចក្តីរាយការណ៍ថា៖ រយៈពេលនៃការសិក្សាហ្វឹកហ្វឺន ដែលធ្វើពិធីបើកវគ្គនាពេលនេះ មានរយៈពេល៣០ថ្ងៃ ដើម្បីក្រើនរំលឹកដល់កងកម្លាំងនគរបាលនៃវរសេនាតូចនគរបាលការពារ៨១៥ អនុវត្តនូវតួនាទីភារកិច្ចរបស់ខ្លួន ជាមន្ត្រីនគរបាលជាតិ ពិសេសគឺរំលឹកអំពីយុទ្ធវិធីប្រយុទ្ធ នៅពេលមានសភាពការណ៍កើតឡើងជាយថាហេតុ។ ចំពោះមេរៀនដែលត្រូវសិក្សាមាន៖១/-វិន័យរបស់កងកម្លាំងនគរបាលជាតិ,២/-លំហាត់របៀប,៣/-ឋានលេខា,៤/-តួនាទីភារកិច្ចនគរបាលការពារព្រំដែន,៥/-យុទ្ធវិធីថ្មើជើង,៦/-ទប់ការជួញដូរបទល្មើសឆ្លងដែន,៧/-អប់រំចិត្តសាស្ត្រ,៨/-យុទ្ធក្រមខម,៩/-ភាពជាអ្នកដឹកនាំ ដែលមានសិក្ខាកាមសរុបចំនួន៦០នាក់។
លោកមេបញ្ជាការក៏បានបញ្ជាក់ថា៖ កងកម្លាំងនគរបាលនៃវរសេនាតូចការពារព្រំដែនគោកលេខ៨១៥ ទន្ទឹមនឹងការងារស្នូលការពារនូវបូរណភាពទឹកដី ក៏បានដើរល្បាតពិនិត្យមើលតាមភូមិសាស្ត្រដែលខ្លួនទទួលខុសត្រូ ដោយសហការណ៍យ៉ាងជិតស្និទជាមួយអាជ្ញាធរមូលដ្ឋាន និងបណ្តាសមត្ថកិច្ចពាក់ព័ន្ធ ដើម្បីរក្សាបាននូវសន្តិសុខសណ្តាប់ធ្នាប់ជូនប្រជាពលរដ្ឋ ក្នុងក៏បានធ្វើការសង្គមជាច្រើនទៀត ដូចជាជួយប្រជាពលរដ្ឋរងគ្រោះដោយគ្រោះធម្មជាតិ ដូចជាទឹកជំនន់ ខ្សល់កន្ត្រាក់ជាដើម។
មានមតិសំណេះសំណាលនាឱកាសនោះ លោក អ៊ុក សម្បត្តិ អភិបាលរងស្រុកម៉ាឡៃ និងលោកឧត្តមសេនីយ៍ត្រី រ៉ែម វីរៈ ស្នងការរងទទួលផែនការងារព្រំដែន បានគូសបញ្ជាក់ថា៖ កងកម្លាំងប្រដាប់អាវុធត្រូវតែមានវិន័យ និងយុទ្ធវិធីប្រយុទ្ធត្រូវតែនៅជាប់ខ្លួន ដោយមិនអាចភ្លេចបានទេ ដើម្បីត្រៀមលក្ខណៈ ប្រយុទ្ធជាប្រចាំ នៅពេលកើតមានហេតុការណ៍អ្វី ជាយថាហេតុ។ ចំពោះអាវុធយុទ្ធភណ្ឌ ត្រូវដុះលាង ជូតសម្អាត និងទុកដាក់ឲ្យបានត្រឹមត្រូវ ។ លោកឧត្តមសេនីយ៍ត្រី រ៉ែម វីរៈ បានផ្តាំផ្ញើដល់សិក្ខាកាមទាំងអស់ ត្រូវយកចិត្តទុកដាក់រៀនសូត្រ និងស្តាប់នូវគ្រូឧទ្ទេសនាម បើកន្លែងណាមិនយល់ ត្រូវហ៊ានសួរនាំ ដើម្បីយកចំណេះដឹងទាំងនេះទៅអនុវត្តឲ្យបានត្រឹមត្រូវ និងជួយបន្តបង្ហាត់បង្រៀនដល់មិត្តរួមការងារក្នុងអង្គភាព ជាងនេះទៀតគឺត្រូវមានសាមគ្គីភាពផ្ទៃក្នុងឲ្យបានល្អ៕
